Chexiya sobiq prezidenti Vatslav Klaus niqobi og‘zi va burnini yopmay turgani uchun 3 ming krona (137 dollar) jarimaga tortildi, deb yozadi “RBK” Chexiya televideniyesiga tayanib.
Jurnalistlar ma’lum qilishicha, 17-noyabr kuni Praga markazida aksilkommunistik “baxmal inqilob” o‘tkazilgan kunni nishonlash chog‘ida Klaus niqobini iyagiga tushirib olgan. Politsiyachilar buni payqab qolgan va sobiq prezidentdan niqobni to‘g‘ri taqishni talab qilgan, ammo u bundan bosh tortgan. Shunda uni politsiya bo‘linmasiga olib ketishgan va qoidabuzarlik haqida protokol tuzishgan.
Xuddi shunday jarimalar Chexiya sobiq sog‘liqni saqlash vaziri Roman Primula va ANO partiyasi rahbarining sobiq birinchi o‘rinbosari Yaroslav Faltinikka nisbatan ham qo‘llanilgan edi.
Noyabrda Chexiya har 100 ming aholiga COVID-19’dan o‘lim holatlari soni bo‘yicha dunyo bo‘yicha yetakchi mamlakatga aylangan edi. Ammo qat’iy cheklov choralari tufayli kasallanish darajasi pasaydi. Chexiya SSV ma’lumotlariga ko‘ra, ayni paytda mamlakatda koronavirus infeksiyasiga chalinish bilan bog‘liq 59 mingta faol holat qayd etilgan. Shularning 4 mingdan ziyodi kasalxonaga yotqizilgan. Butun pandemiya davrida mamlakatda kasallanganlar soni esa 546 ming nafardan oshadi, 8902 kishi vafot etgan.
3-dekabrdan mamlakat hukumati cheklovlarni yumshatdi. Hozir mamlakatda do‘konlar va restoranlar ishlamoqda, ammo mijozlar soni cheklangan. Shuningdek, komendantlik soati ham bekor qilindi va ommaviy sport tadbirlarining cheklangan sondagi ishtirokchilar bilan o‘tkazilishiga ruxsat berildi.
Mavzuga doir:
- Chexiya sog‘liqni saqlash vaziri o‘zi joriy qilgan koronavirusga qarshi choralarni buzgani uchun iste’foga chiqdi
- Chexiya bir hafta ichida koronavirusdan o‘limlar soni bo‘yicha yetakchiga aylandi
- COVID-19 tufayli butun dunyo bo‘ylab joriy qilingan yangi cheklovlar. Asosiy ma’lumotlar
- Chexiya Yevroittifoqda koronavirusdan o‘lim holatlari bo‘yicha yetakchi davlatga aylandi
Izoh (0)