Rossiya maxsus xizmatlari 2020-yilda mamlakat hududida 41 ta teraktning oldini oldi. Bu haqda Federal xavfsizlik xizmati direktori, Milliy antiterror qo‘mitasi raisi Aleksandr Bortnikov ma’lum qildi, deb yozmoqda “Interfaks”.
“Tayyorgarlik bosqichida bo‘lgan terroristik yo‘nalishdagi 61 ta jinoyatning, shu jumladan, 41 ta teraktning oldi olindi”, — deyiladi qo‘mita xabarida.
Qo‘mita tomonidan qayd etilishicha, 2020-yilda 49 nafar jangari, shu jumladan, 8 nafar guruh boshlig‘i yo‘q qilingan, 36 nafar to‘da boshlig‘i, 162 nafar jangari va ularning 591 nafar sherigi qo‘lga olingan.
Rossiya hududida 2020-yilda xalqaro terrorchilik guruhlarining 55 ta hujrasi faoliyatiga chek qo‘yilgan. Ekstremistik va terroristik faoliyatga aloqador bo‘lgan 149 nafar xorijlik Rossiya hududiga kiritilmagan.
Jangarilardan 600 dona o‘qotar qurol, 134 ta qo‘lbola bomba, 100 mingdan ortiq patron, 3 mingdan ortiq mina, granata va boshqa o‘q-dorilar olib qo‘yilgan. Qurol ishlab chiqarish va ularni o‘zgartirish bilan shug‘ullanuvchi 50 ta noqonuniy ustaxona yo‘q qilingan.
Avvalroq Rossiya Federal xavfsizlik xizmati Volgograd shahrida Suriyadagi terrorchilar ko‘rsatmasi asosida terakt rejalashtirgan ikki nafar jangarini yo‘q qilgandi, Keyinroq mazkur shaxslar O‘zbekiston fuqarolari bo‘lgani ma’lum qilindi.
Izoh (0)