Туркия Россиянинг коронавирусга қарши вакцинасини сотиб олишдан бош тортди. Бу ҳақда Туркия соғлиқни сақлаш вазири Фахреттин Кўжа маълум қилди, деб ёзмоқда Meduza.
Вазирнинг сўзларига кўра, вакцина ишончли лаборатория амалиёти принципларига мос келмайди.
«Россия (бу шартларни) бажара олмади. Шу тариқа, ЖССТ ва бутун дунё учун бу вакцинани сотиб олиш имконсиз кўринмоқда. Биз ҳам ундан фойдаланиш учун рухсат бера олмаймиз. Шу сабабли у бизнинг қизиқишимиз доирасидан чиқди», — дея маълум қилган Туркия соғлиқни сақлаш вазири.
«Спутник V» вакцинасини яратиш ишларини бошқарган Россия тўғридан-тўғри инвестициялар жамғармасидаги манбанинг «ТАСС»га маълум қилишича, Туркиянинг вакцинадан бош тортгани ҳақидаги маълумот ишончсиз. Унинг сўзларига кўра, музокаралар давом этмоқда. «Вазирнинг гаплари — сохта хабар», — дея таъкидлаган манба.
Туркияда коронавирусга қарши эмлаш 11 декабрдан бошланади. Бунинг учун Хитой вакцинасидан фойдаланилади. Бироқ Туркия президенти Ражаб Тоййиб Эрдўғон мамлакат вакцина сотиб олиш бўйича нафақат Хитой, балки Россия билан ҳам музокара олиб бораётгани ҳақида гапирган.
Россия Соғлиқни сақлаш вазирлиги ноябрь ойида Туркия «Спутник V» вакцинасини ишлаб чиқаришни ташкил қилишга қизиқиш билдирганини маълум қилган. Ундан аввал эса туркиялик расмийлар вакцинанинг токсикологик синовини ўтказишни хоҳлаган.
Эслатиб ўтамиз, Россия Соғлиқни сақлаш вазирлигининг Гамалея институти томонидан ишлаб чиқилган ва «Спутник V» вакцинаси 11 августда рўйхатдан ўтказилган. Вакцина клиник синовлари учинчи босқичининг оралиқ таҳлил натижалари 92 фоиз самарадорликни ташкил этишини кўрсатди. Декабрь ойи бошларида вакцина иккита компонентининг максимал нархи маълум қилинди.
Изоҳ (0)