Xitoyning COVID-19’ga qarshi vaksina ishlab chiqqan Sinovac Biotech kompaniyasi 7-dekabr kuni o‘zining Sinovac Life Sciences bo‘linmasining 15 foizi sotilganini e’lon qildi, deb yozadi “Kommersant”. Kompaniya ulushi Xitoydagi eng yirik jenerik (asl dorining nusxasi) ishlab chiqaruvchilardan biri Sino Biopharmaceutical kompaniyasiga taxminan 500 million dollarga sotildi. Shu tariqa, kompaniya ma’lum qilishicha, Sinovac o‘zini CoronaVac vaksinasini ishlab chiqarish uchun zarur bo‘lgan mablag‘ bilan ta’minlagan.
Oldi-sotdi shartnomasi kompaniya vaksina sinovlarining yakuniy bosqichi haqidagi ma’lumotlarni e’lon qilishga tayyorlanayotgan hamda emlash dasturi boshlanishini kutib, CoronaVac’ni butun dunyo bo‘ylab yetkazib berishni boshlagan bir paytda tuzildi.
Kompaniya ma’lum qilishicha, u yiliga 300 million doza vaksina chiqarishga tayyor, 2020-yil oxirigacha esa vaksina ishlab chiqariladigan ikkinchi zavod qurilishini yakunlashni rejalashtirmoqda, bu uning ishlab chiqarish quvvatini ikki karra oshiradi.
Eslatib o‘tamiz, avvalroq Braziliya Sog‘liqni saqlash vazirligi Xitoyning Sinovac Biotech kompaniyasidan Coronavac vaksinasining 46 millionta dozasi xarid qilinishini ma’lum qilgan, vaksinani yetkazib berish 2021-yilning yanvar oyida boshlanishi kerak edi. Keyinroq Braziliya prezidenti Jair Bolsonaru mamlakat Sog‘liqni saqlash vazirligi tomonidan imzolangan Xitoyda yaratilgan COVID-19’ga qarshi vaksinani sotib olish haqidagi shartnomani bekor qilgani haqida xabar berilgandi.
Shuningdek, Turkiya Xitoyning SinoVac kompaniyasidan 50 million doza vaksina buyurtma qilgan, shuningdek, Pfizer tomonidan BioNTech bilan hamkorlikda ishlab chiqarilgan vaksinani sotib olish bo‘yicha muzokaralar olib bormoqda.
Izoh (0)