Хитойнинг COVID-19’га қарши вакцина ишлаб чиққан Sinovac Biotech компанияси 7 декабрь куни ўзининг Sinovac Life Scienceс бўлинмасининг 15 фоизи сотилганини эълон қилди, деб ёзади «Коммерсантъ». Компания улуши Хитойдаги энг йирик женерик (асл дорининг нусхаси) ишлаб чиқарувчилардан бири Sino Biopharmaceutical компаниясига тахминан 500 миллион долларга сотилди. Шу тариқа, компания маълум қилишича, Sinovac ўзини CoronaVac вакцинасини ишлаб чиқариш учун зарур бўлган маблағ билан таъминлаган.
Олди-сотди шартномаси компания вакцина синовларининг якуний босқичи ҳақидаги маълумотларни эълон қилишга тайёрланаётган ҳамда эмлаш дастури бошланишини кутиб, CoronaVac’ни бутун дунё бўйлаб етказиб беришни бошлаган бир пайтда тузилди.
Компания маълум қилишича, у йилига 300 миллион доза вакцина чиқаришга тайёр, 2020 йил охиригача эса вакцина ишлаб чиқариладиган иккинчи завод қурилишини якунлашни режалаштирмоқда, бу унинг ишлаб чиқариш қувватини икки карра оширади.
Эслатиб ўтамиз, аввалроқ Бразилия Соғлиқни сақлаш вазирлиги Хитойнинг Sinovac Biotech компаниясидан Coronavac вакцинасининг 46 миллионта дозаси харид қилинишини маълум қилган, вакцинани етказиб бериш 2021 йилнинг январь ойида бошланиши керак эди. Кейинроқ Бразилия президенти Жаир Болсонару мамлакат Соғлиқни сақлаш вазирлиги томонидан имзоланган Хитойда яратилган COVID-19’га қарши вакцинани сотиб олиш ҳақидаги шартномани бекор қилгани ҳақида хабар берилганди.
Шунингдек, Туркия Хитойнинг SinoVac компаниясидан 50 миллион доза вакцина буюртма қилган, шунингдек, Pfizer томонидан BioNTech билан ҳамкорликда ишлаб чиқарилган вакцинани сотиб олиш бўйича музокаралар олиб бормоқда.
Изоҳ (0)