1981-yil Xalq artisti unvoni, shuningdek, 4 ta oliy mukofot, ko‘plab kino va teatr mukofotlari sovrindori – Rossiyaning mahoratli aktrisasi Alisa Freyndlix 8-dekabr kuni 86 yoshga to‘ldi.
Alisa Brunovna 1934-yil 8-dekabr kuni Rossiyaning Leningrad shahrida tug‘ilgan. Unga ism otasi va buvisi tomonidan qo‘yilgan bo‘lib, onasi uni Natasha deb chaqirishni yoqtirgan. Alisaning otasi yarim nemis, onasi esa Pskovdan edi. Alisaga aktyorlik mahorati aktyorlik kursida uchrashgan ota-onasidan o‘tgan. Afsuski, ularning oilasi urush boshlanmasidan avval ajralib ketgan.
Urush, qamal, ochlik… Aktrisaning bolaligi havas qilgulik darajada o‘tmagan. Uning o‘zi esa u davrlarni shunday eslaydi: “Men shu qadar qadimiy insonmanki, ilk xotiralarim urushgacha bo‘lgan. Ular, ehtimol, keyingilariga qaraganda yorqinroqdir. Bolaligim baxtli o‘tgan, ota-onam yosh, har narsaga g‘ayratli, hali o‘ynab-kulishni istar edi”.
Urush tugaganidan so‘ng Alisa teatr guruhida tahsil olishni boshlagan va ushbu san’at turiga shunchalar qiziqib qolganidan 1953-yil Ostrovskiy nomidagi teatr institutiga o‘qishga kirgan.
O‘qishni muvaffaqiyatli yakunlagan Alisa Leningrad drama teatriga, undan so‘ng Lensovet akademik teatriga ishga joylashgan. Avvalgi ish joyida ikkinchi darajali rollari tufayli taqdirlangan bo‘lsa, keyinchalik teatrning bosh aktrisasiga aylangan va turmush o‘rtog‘i rejissor Igor Vladimirovning spektakllarida rol ijro etgan.
“Igor Petrovich Vladimirov – mening san’atdagi haqiqiy ustozim. G‘amxo‘r va talabchan o‘qituvchim. Mening sodiq do‘stim. Men teatrdagi barcha yutuqlarim uchun undan qarzdorman”, − deydi aktrisa.
Alisa birinchi marta 1956-yil o‘z kursdoshi Vladimir Karasevga turmushga chiqqan, ammo institutni yakunlaguncha ajrashib ketgan. Birinchi turmushi haqida aktrisa shunday deydi: “Menimcha, bu bir sinov yoki nikoh nima ekanligini bilishga bo‘lgan tajribasiz urinish edi”.
Ikkinchi oilasi yuqorida aytilganidek, rejissor Igor Vladimirov – Alisani taniqli aktrisaga aylanishiga sababchi bo‘lgan inson edi. Ular 1961-yil turmush qurgan va 20 yil davomida baxtli hayot kechirgan. Alisa 34 yoshida qizalog‘i Varvarani dunyoga keltirgan. Alisaning muvaffaqiyati sababli erining rashki, shuningdek, mehribon turmush o‘rtog‘i uchun ayollarning aktrisaga hasadi ortidan ular ajrashishga qaror qilgan. Oradan ikki yil o‘tib, aktrisa Lensovet teatridagi ish faoliyatini ham yakunlagan.
“Bizning ayrilig‘imiz Igor uchun ham, teatr uchun ham og‘ir edi. Men buni anglaganim uchun ham spektakllardagi rolimni ijro etaman, deb qasam ichdim. Ammo Igor buni xohlamadi. Ishtirokimdagi spektakllar repertuardan butunlay olib tashlandi. Shuningdek, teatrda yangi aktrisalar ham paydo bo‘lgandi”, − deydi hozirgacha Tovstonogov nomidagi katta drama teatrida faoliyat yuritayotgan aktrisa.
Aktrisaning uchinchi turmushi yosh aktyor va rassom Yuriy Solovey bilan 12 yil davom etdi. “Yura bilan ham hayotimiz juda yaxshi kechdi. U meni boshqalar kabi kasbimdan rashk qilmas edi. Ammo u Germaniya ketish taklifini bildirdi va u yerda ishga joylashdi. Men buni rad etdim, natijada ayrilishimizga to‘g‘ri keldi”.
1990-yildan so‘ng aktrisa bor mehrini qizi va nabirasiga bag‘ishlashni muhim deb bildi va boshqa oila qurmadi. Alisaning qizi Varvara aktrisa sifatida spektakllarda onasi bilan rol ijro etgan.
Uning Nikita va Anya ismli farzandlari bor. Nikita ham onasi va buvisining izidan borib, san’atning boshqa sohasida prodyuserlik bilan shug‘ullanadi. Yana bir nabirasi Anna tufayli aktrisa katta buviga aylandi, uning Sonya ismli qizalog‘i 1,5 yil avval dunyoga kelgan.
Alisa 23 yoshidan boshlab 63 yil davomida teatrda “yashadi”, desa ham bo‘ladi. “Mening quvvatim juda oz qoldi. Sahnaga chiqishdan avval ibodat qilaman. Qarindosh, yaqinlar, men uchun qadrli bo‘lgan barchadan kechirim so‘rayman. Oz bo‘lsa ham ularning ko‘maklariga muhtojman”, − deydi ayni damda 86 yoshni qarshilagan aktrisa.
Izoh (0)