«Ишдаги ишқ» фильми юлдузи Алиса Фрейндлих 86 ёшда. Актриса ҳақида кўпчилик билмайдиган қизиқарли маълумотлар (фото)

1981 йил Халқ артисти унвони, шунингдек, 4 та олий мукофот, кўплаб кино ва театр мукофотлари совриндори – Россиянинг маҳоратли актрисаси Алиса Фрейндлих 8 декабрь куни 86 ёшга тўлди.

Алиса Бруновна 1934 йил 8 декабрь куни Россиянинг Ленинград шаҳрида туғилган. Унга исм отаси ва бувиси томонидан қўйилган бўлиб, онаси уни Наташа деб чақиришни ёқтирган. Алисанинг отаси ярим немис, онаси эса Псковдан эди. Алисага актёрлик маҳорати актёрлик курсида учрашган ота-онасидан ўтган. Афсуски, уларнинг оиласи уруш бошланмасидан аввал ажралиб кетган.

Уруш, қамал, очлик… Актрисанинг болалиги ҳавас қилгулик даражада ўтмаган. Унинг ўзи эса у даврларни шундай эслайди: «Мен шу қадар қадимий инсонманки, илк хотираларим урушгача бўлган. Улар, эҳтимол, кейингиларига қараганда ёрқинроқдир. Болалигим бахтли ўтган, ота-онам ёш, ҳар нарсага ғайратли, ҳали ўйнаб-кулишни истар эди».

Уруш тугаганидан сўнг Алиса театр гуруҳида таҳсил олишни бошлаган ва ушбу санъат турига шунчалар қизиқиб қолганидан 1953 йил Островский номидаги театр институтига ўқишга кирган.

Ўқишни муваффақиятли якунлаган Алиса Ленинград драма театрига, ундан сўнг Ленсовет академик театрига ишга жойлашган. Аввалги иш жойида иккинчи даражали роллари туфайли тақдирланган бўлса, кейинчалик театрнинг бош актрисасига айланган ва турмуш ўртоғи режиссёр Игор Владимировнинг спектаклларида роль ижро этган.

«Игор Петрович Владимиров – менинг санъатдаги ҳақиқий устозим. Ғамхўр ва талабчан ўқитувчим. Менинг содиқ дўстим. Мен театрдаги барча ютуқларим учун ундан қарздорман», − дейди актриса.

Алиса биринчи марта 1956 йил ўз курсдоши Владимир Карасевга турмушга чиққан, аммо институтни якунлагунча ажрашиб кетган. Биринчи турмуши ҳақида актриса шундай дейди: «Менимча, бу бир синов ёки никоҳ нима эканлигини билишга бўлган тажрибасиз уриниш эди».

Иккинчи оиласи юқорида айтилганидек, режиссёр Игор Владимиров – Алисани таниқли актрисага айланишига сабабчи бўлган инсон эди. Улар 1961 йил турмуш қурган ва 20 йил давомида бахтли ҳаёт кечирган. Алиса 34 ёшида қизалоғи Варварани дунёга келтирган. Алисанинг муваффақияти сабабли эрининг рашки, шунингдек, меҳрибон турмуш ўртоғи учун аёлларнинг актрисага ҳасади ортидан улар ажрашишга қарор қилган. Орадан икки йил ўтиб, актриса Ленсовет театридаги иш фаолиятини ҳам якунлаган.

«Бизнинг айрилиғимиз Игор учун ҳам, театр учун ҳам оғир эди. Мен буни англаганим учун ҳам спектакллардаги ролимни ижро этаман, деб қасам ичдим. Аммо Игор буни хоҳламади. Иштирокимдаги спектакллар рэпертуардан бутунлай олиб ташланди. Шунингдек, театрда янги актрисалар ҳам пайдо бўлганди», − дейди ҳозиргача Товстоногов номидаги катта драма театрида фаолият юритаётган актриса.

Актрисанинг учинчи турмуши ёш актёр ва рассом Юрий Соловей билан 12 йил давом этди. «Юра билан ҳам ҳаётимиз жуда яхши кечди. У мени бошқалар каби касбимдан рашк қилмас эди. Аммо у Германия кетиш таклифини билдирди ва у ерда ишга жойлашди. Мен буни рад этдим, натижада айрилишимизга тўғри келди».

1990 йилдан сўнг актриса бор меҳрини қизи ва набирасига бағишлашни муҳим деб билди ва бошқа оила қурмади. Алисанинг қизи Варвара актриса сифатида спектаклларда онаси билан роль ижро этган.

Унинг Никита ва Аня исмли фарзандлари бор. Никита ҳам онаси ва бувисининг изидан бориб, санъатнинг бошқа соҳасида продюсерлик билан шуғулланади. Яна бир набираси Анна туфайли актриса катта бувига айланди, унинг Соня исмли қизалоғи 1,5 йил аввал дунёга келган.

Алиса 23 ёшидан бошлаб 63 йил давомида театрда «яшади», деса ҳам бўлади. «Менинг қувватим жуда оз қолди. Саҳнага чиқишдан аввал ибодат қиламан. Қариндош, яқинлар, мен учун қадрли бўлган барчадан кечирим сўрайман. Оз бўлса ҳам уларнинг кўмакларига муҳтожман», − дейди айни дамда 86 ёшни қаршилаган актриса.