Tizimni raqamlashtirish va jarayonlarni avtomatlashtirish O‘zbekistonda bojxona sohasini korrupsiyada tozalashning ustuvor yo‘nalishlari sifatida ko‘rilmoqda. Bu haqda Davlat bojxona qo‘mitasi (DBQ) Kadrlar boshqarmasi boshlig‘i Ilhom Muxtorov ma’lum qildi.
Muxtorovning ta’kidlashicha, hozirda bojxona sohasida korrupsion holatlar asosan bojxona qiymatini pasaytirish bilan bog‘liq jarayonlarda uchramoqda, chunki bojxona qiymati mansabdor shaxs qarori bilan belgilanadi.
“Tizimda raqamlashtirish va avtomatlashtirish ishlarini amalga oshiryapmiz. Xizmatlarni avtomatlashtirganimiz bilan, korrupsiya butunlay yo‘qolmasligi mumkin, biroq bu ishlar korrupsiyani minimallashtirish uchun katta xizmat qiladi”, — dedi u.Avvalroq bosh prokuror Nig‘matilla Yo‘ldoshev o‘tgan ikki yilda 27 nafar bojxona xizmati xodimi korrupsion jinoyatlari uchun javobgarlikka tortilganini ma’lum qilgan edi. Jumladan, “Ark buloq” bojxona posti boshlig‘ining uyidan pora sifatida olingan 311 ming dollar naqd pul topilgani xabar qilingan edi.
Izoh (0)