Toshkent ko‘chalarida 1-dekabrdan boshlab 51-yo‘nalishda (Yunusobod 6-mavze—Beshyog‘och maydoni) 12 metrlik “Zhongtong” elektr avtobusi sinov tariqasida harakatlana boshladi.
Ma’lum qilinishicha, bu poytaxtda sinovdan o‘tkazilayotgan beshinchi elektr avtobus. Bundan avval SamAuto kompaniyasi 19-noyabr kuni “Toshshahartransxizmat”ga 51-yo‘nalish bo‘yicha harakatlanadigan sinov elektrobusini taqdim etgandi.
Qayd etilishicha, atrof-muhitni muhofaza qilish bo‘yicha 2030-yilgacha mo‘ljallangan konsepsiyasiga muvofiq, O‘zbekiston jamoat transportining kamida 50 foizi zararli moddalarni havoga chiqarishni kamaytirish uchun muqobil yoqilg‘i turlariga o‘tishi kerak.
Eslatib o‘tamiz, Toshkent shahar hokimi Jahongir Ortiqxo‘jayev va “Belkommunmash” rahbari Vladimir Korol o‘rtasida 2018-yil sentabrida bo‘lib o‘tgan muzokaralar yakuniga ko‘ra, Belarus elektrobuslaridan birini Toshkentda sinab ko‘rish bo‘yicha kelishuvga erishilgan edi. 450 ming dollarga xarid qilingan birinchi elektrobus Toshkentda 2019-yilning 13-sentabridan harakatlanishni boshlagandi. 2020-yilning mart oyidan boshlab esa Toshkentning 52-avtobus yo‘nalishi (Beshyog‘och—Yunusobod) bo‘ylab Xitoyning Yutong elektrobusi sinov tariqasida qatnay boshlagandi.
Avvalroq Toshkentga uch yil ichida 300 ta yangi elektrobus olib kelinishi mumkinligi haqida xabar berilgandi.
Izoh (0)