Qamchiq dovonida propan ortilgan 24 tonnalik sisternani olib ketayotgan MAN yuk mashinasi ag‘darilib ketdi, deya xabar bermoqda Favqulodda vaziyatlar vazirligi.
Qayd etilishicha, hodisa 4-dekabr kuni erta tongda Toshkent–O‘sh xalqaro avtomobil yo‘lining 196-kilometrida sodir bo‘lgan.
Ma’lum qilinishicha, MAN yuk mashinasi haydovchisi Farg‘onaga propan ortilgan 24 tonnalik sisternani olib ketayotgan vaqtda boshqaruvni yo‘qotib, yon tomonga ag‘darilib ketgan.
Holat yuzasidan voqea joyiga 10 daqiqa ichida Favqulodda vaziyatlar vazirligining “Qamchiq” maxsus qidiruv, yong‘in-qutqaruv boshqarmasining qutqaruv guruhlari yetib kelgan.
Yuk mashinasi kabinasining deformatsiyasi tufayli haydovchining oyog‘i qisilib qolgan bo‘lib, qutqaruvchilar bir necha soniyada maxsus qutqaruv anjomlari yordamida haydovchini xavfsiz qutqarib olgan va kasalxonaga yetkazgan. Hozirda haydovchi o‘zini yaxshi his qilmoqda.
Shundan so‘ng FVV va Yo‘l harakati xavfsizligi xizmati xodimlari hamkorligida yuk mashinasi xizmat ko‘rsatish stansiyasiga evakuatsiya qilingan.
https://youtu.be/cFwdjgVutOM
Avvalroq Samarqandda ichida 20 nafar yo‘lovchi bo‘lgan avtobus asfaltning sirpanchiqligi oqibatida ag‘darilib ketgani, Navoiyda 19 yoshli haydovchi boshqaruvidagi Nexia ag‘darilib ketishi oqibatida bir kishi halok bo‘lgani hamda Gulistonda YHXBning Mercedes mashinasi “Niva”ga urilib, uni ag‘darib yuborgani haqida xabar berilgandi.
Izoh (0)