Toshkentda 72 va 148-yo‘nalishda harakatlanuvchi Mercedes va Isuzu avtobuslari yo‘lovchi talashib katta tezlikda xavfli ravishda harakatlangani videosi tarqaldi.
Hodisa 4-dekabr, juma kuni soat 07:48 da avtomobildagi videoregistratorga qayd etilgan. Tasvirda ikki avtobus bir-biriga juda ham yaqin masofada katta tezlikda harakat qilayotgani aks etgan.
Video yakunida Isuzu avtobusi Mercedesga old yon tarafi bilan urilganini ko‘rish mumkin.
Ijtimoiy tarmoqlarda hodisa muhokamalarga sabab bo‘lgan. Telegram kanallaridan birida hodisaga quyidagicha izoh qoldirilgan:
“TShTX (“Toshshahartransxizmat”) 72-sonli yo‘nalishda harakatlanuvchi avtobusni Yunusobodga qaytarish kerakligini unutmagan bo‘lsangiz kerak. Yoki siz hali ham shaxsiy manfaatlarni xalq manfaatlaridan ustun qo‘yasizmi?”, — deyiladi videoizohida.
Toshkentda Isuzu avtobusi simyog‘ochga urilishi oqibatida besh kishi jarohatlangani, 116-yo‘nalishda harakatlanuvchi avtobus yonib ketgani hamda Samarqandda ichida 20 nafar yo‘lovchi bo‘lgan avtobus asfaltning sirpanchiqligi oqibatida ag‘darilib ketgani haqida xabar berilgandi.
Izoh (0)