O‘zbekistonda 2020-yilning yanvar—noyabr oylari davomida bozorlar va savdo komplekslarida jami 9 ta yong‘in sodir bo‘lgan. Bu haqda FVV boshqarma boshlig‘i Zulfiqor Qilichovga tayanib, “Kun.uz” xabar berdi.
FVV mas’ul xodimi so‘nggi paytlarda bozorlarda yong‘inlar ko‘paygani, bu boradagi statistika qanday ekanligi va bozorlar ataylab yoqilishiga oid taxminlar to‘g‘risidagi savollarga javob qaytargan.
Qilichovning ma’lum qilishicha, 2020-yilning o‘tgan davri mobaynida respublika hududidagi bozorlar va savdo komplekslarida 9 ta yong‘in sodir bo‘lgan. “Oqibatida 369 million so‘mdan ortiq moddiy zarar ko‘rilgan. Sodir bo‘lgan yong‘inlarning 8 tasi elektr uskunalaridan foydalanish va tuzilish qoidalari buzilishidan, bittasi chekish vaqtida ehtiyotsizlikdan deb topilgan”, — deydi FVV boshqarma boshlig‘i.
Uning so‘zlariga ko‘ra, holatlar yuzasidan Davlat yong‘in nazorati hamda ichki ishlar organlari tomonidan tekshiruv harakatlari olib borilib, tegishli qarorlar qabul qilingan. Ta’kidlanishicha, har bir yong‘in holati bo‘yicha alohida surishtiruvlar olib boriladi.
Avvalroq Parkentdagi dehqon bozorida, Oqdaryodagi buyum bozorida, Asakadagi kiyim-kechak bozorida, Andijon tumanidagi dehqon bozorida yong‘in sodir bo‘lgani va Surxondaryodagi bozorda 51 ta savdo rastasi yonib ketgani to‘g‘risida xabarlar berilgandi.
Izoh (0)