Ўзбекистонда 2020 йилнинг январь—ноябрь ойлари давомида бозорлар ва савдо комплексларида жами 9 та ёнғин содир бўлган. Бу ҳақда ФВВ бошқарма бошлиғи Зулфиқор Қиличовга таяниб, «Kun.uz» хабар берди.
ФВВ масъул ходими сўнгги пайтларда бозорларда ёнғинлар кўпайгани, бу борадаги статистика қандай эканлиги ва бозорлар атайлаб ёқилишига оид тахминлар тўғрисидаги саволларга жавоб қайтарган.
Қиличовнинг маълум қилишича, 2020 йилнинг ўтган даври мобайнида республика ҳудудидаги бозорлар ва савдо комплексларида 9 та ёнғин содир бўлган. «Оқибатида 369 миллион сўмдан ортиқ моддий зарар кўрилган. Содир бўлган ёнғинларнинг 8 таси электр ускуналаридан фойдаланиш ва тузилиш қоидалари бузилишидан, биттаси чекиш вақтида эҳтиётсизликдан деб топилган», — дейди ФВВ бошқарма бошлиғи.
Унинг сўзларига кўра, ҳолатлар юзасидан Давлат ёнғин назорати ҳамда ички ишлар органлари томонидан текширув ҳаракатлари олиб борилиб, тегишли қарорлар қабул қилинган. Таъкидланишича, ҳар бир ёнғин ҳолати бўйича алоҳида суриштирувлар олиб борилади.
Аввалроқ Паркентдаги деҳқон бозорида, Оқдарёдаги буюм бозорида, Асакадаги кийим-кечак бозорида, Андижон туманидаги деҳқон бозорида ёнғин содир бўлгани ва Сурхондарёдаги бозорда 51 та савдо растаси ёниб кетгани тўғрисида хабарлар берилганди.
Изоҳ (0)