O‘zbekistondan Rossiyaga yetib borgan 1 tonna quritilgan o‘rik orasida karantin ahamiyatiga ega bo‘lgan zararli organizm — kapr qo‘ng‘izi (Trogoderma granarium Ev.) aniqlandi, deya xabar bermoqda mamlakat veterinariya va fitosanitariya nazorati bo‘yicha federal xizmati.
Ma’lum qilinishicha, zararli organizm lichinkasi 1 kilogramm mahsulotda 2 dona miqdorida topilgan, bu partiyaning jiddiy zararlanganligini ko‘rsatadi.
Ushbu partiya Rossiya fitosanitariya talablariga muvofiqligini tasdiqlovchi o‘zbekcha sertifikat bilan Rossiyaga olib kirilgan. Kapr qo‘ng‘izi O‘zbekistonda rasmiy ravishda yo‘q qilingan obyekt hisoblanadi.
Kapr qo‘ng‘izi ko‘plab mamlakatlarda karantin ahamiyatiga ega organizmlar ro‘yxatiga kiritilgan bo‘lib, u zaxiradagi mahsulotlarning 70 foizini yo‘q qilishi mumkin.
Rossiya veterinariya va fitosanitariya nazorati bo‘yicha federal xizmati O‘zbekistondan quritilgan mevalar va yong‘oqlarni olib kirishni taqiqlash huquqini o‘zida saqlab qolishini ma’lum qildi. Shuningdek, xizmat yaqin kelajakda hozirgi vaziyatni muhokama qilish uchun o‘zbek tomoni bilan muzokaralarni boshlashi ta’kidlangan.
Avvalroq 26-noyabr kuni Rossiya tomoni Farg‘ona viloyatida yetishtirilgan pomidor va bulg‘or qalampirining olib kirilishiga vaqtinchalik cheklov joriy etgan edi. “Rosselxoznadzor”ning aniqlik kiritishicha, bunga mahsulotlarda ToBRFV (tomato brown rugose fruit virus) virusi topilgani sabab bo‘lgan. Qayd etish joiz, Rossiya vaqtinchalik taqiqni joriy etganini e’lon qilgach, O‘zbekiston Investitsiyalar va tashqi savdo vazirligi “Rosselxoznadzor” bilan mazkur masala bo‘yicha maslahatlashuvlar o‘tkazayotganini ma’lum qilgan edi. “O‘zdavkarantin” ham vaziyatni o‘rganmoqda.
Shu bilan birga, Qozog‘iston O‘zbekistondan pomidor import qilishni vaqtincha cheklashi mumkinligi haqida xabar berilgandi.
Izoh (0)