“Yermulkkadastr” davlat korxonasining Oltiariq tuman filiali mutaxassisi E.M. fuqarolar O.N. va F.T.ga 5 gektar yer ajratib berishini va’da qilib, evaziga 22 ming dollar va 28,5 million so‘mni pora tariqasida olayotgan vaqtida ushlangan, deya xabar berdi “Daryo” muxbiri Azizjon Ermatov.
Ma’lum bo‘lishicha, bu haqda Farg‘ona viloyat prokurori rahbarligida korrupsiyaga qarshi kurashish masalalariga bag‘ishlab o‘tkazilgan idoralararo yig‘ilishda ma’lum qilingan.
Yig‘ilishda ma‘lum qilinishicha, Uchko‘prik tumani qurilish bo‘limi boshlig‘i D.M. fuqaro A.H.ga tegishli bo‘lgan xususiy shifoxona loyihasi hujjatlarini tasdiqlab berish evaziga 800 ming so‘m, fuqaro A.S.ning turar-joy binolariga texnik loyiha hujjatlarini tasdiqlab berish evaziga esa 250 ming so‘m pullarni pora tariqasida olgan.
Shuningdek, Marg‘ilon shahar aholi bandligiga ko‘maklashish markazi direktori o‘rinbosari A.M. 2020-yilning aprel oyida “Chilonzor” mahalla fuqarolar yig‘inida o‘tkazilgan tekshirishda aniqlangan qonunbuzilishlari bo‘yicha dalolatnoma rasmiylashtirmaslik va hujjatlarni huquqni muhofaza qiluvchi organlarga yubormaslik evaziga MFY kotibi Z.U.dan 2 million 300 ming so‘m miqdordagi pullarni pora tariqasida olgan vaqtida ushlangan.
Izoh (0)