Коронавирусга чалинган айрим беморларда тана ҳарорати меъёрдан паст бўлмоқда. «РБК»нинг ёзишича, бу ҳақда иммунолог-аллерголог Владимир Болибок «Lenta.ru»га маълум қилди.
«Айримларда 1,5—2 ҳафта давомида тана ҳарорати юқори бўлади. Айримларда эса умуман бошқача ҳолат: улар бир-икки кун иситмалаб, кейин ҳарорати 35 даража ва ундан пастга тушиб кетмоқда», — дейди Болибок.
Унинг сўзларига кўра, паст ҳарорат COVID-19’нинг енгил шакли билан оғриган беморларда кузатилади. Бунинг сабаби организмдаги моддалар алмашинуви бошқарувининг бузилиши бўлиши мумкин.
Ноябрь ойи ўрталарида Буюк Британия ва АҚШ олимлари коронавирус инфекциясининг дастлабки босқичида кузатилган симптомларни маълум қилган, улар орасида иштаҳа йўқолиши, кўнгил айниши, қайт қилиш ва ошқозон оғриғи, овқат ҳазм қилиш муаммолари кабиларни кўрсатганди. Инфекция юқтириб олганнинг яна бир белгиси конъюнктивит бўлиши мумкин, лекин бу симптом камдан-кам — тахминан, 3 фоиз ҳолларда учрайди.
Бундан ташқари, паришонхотирлик ва чарчоқ ҳам COVID-19 аломати бўлиши мумкин. Иккинчиси тахминан ҳар иккинчи беморда қайд этилмоқда.
Аввалроқ коронавирусдан тузалиб чиққанлар тишлари тушаётганидан шикоят қилаётгани, вирусни бошдан ўтказган кишилар эрта қариши мумкинлиги ҳақида хабар берилган эди.
Изоҳ (0)