“Daryo”ni Telegram’da o‘qing! Join!
16:19, 21.11.2020 30607

Britaniya va amerikalik shifokorlar COVID-19’ning dastlabki to‘rtta alomatini ma’lum qildi

Buyuk Britaniya va AQSh shifokorlari koronavirusga chalinishning dastlabki bosqichida paydo bo‘ladigan to‘rtta keng tarqalgan simptomlarni ma’lum qildi. Bu haqda Express nashriga tayanib, “RBK” xabar bermoqda.

Foto: Getty Images

Alberta universiteti olimi Mitch Uilsonning aytishicha, koronavirusga chalingan deyarli har beshinchi bemor ovqat hazm qilish bilan bog‘liq muammoga duch keladi. Gastroenterologik simptomlarga ishtaha yo‘qolishi, ko‘ngil aynishi, qayt qilish va qorin og‘rig‘i kiradi. Uilson, shu bilan birga, bunday alomatlar boshqa kasalliklar uchun ham xos ekanligini ta’kidlab o‘tgan.

Amerika Oftalmologiya akademiyasida koronavirusning yana bir belgisi konyunktivit ekanligi, ammo bu alomat kamdan kam, taxminan, 3 foiz hollarda uchrashi aytildi.

London Imperial kolleji olimlarining ta’kidlashicha, parishonxotirlik ham infeksiya alomatidir. Ularning fikricha, ushbu sindrom sog‘aygandan keyin bir necha oygacha davom etishi mumkin.

Dublin shahridagi Triniti kolleji olimlari charchoqni ham dastlabki alomatlardan biri deb atadi. Ular ushbu alomat taxminan har ikkinchi bemorda uchrashi va 10 haftagacha davom etishi mumkinligini aniqladi.

Avvalroq virusolog, tibbiyot fanlari doktori va Rossiyada xizmat ko‘rsatgan fan arbobi Anatoliy Altshteyn koronavirusning asosiy simptomlari isitma, yo‘tal, tomoq og‘rig‘i, hid va ta’m bilishni yo‘qotish ekanligini ma’lum qilgandi. Shuningdek, boshqa simptomlar ham kuzatilishi mumkinligini, lekin asosiy 5 ta simptomlar bo‘lmasa, qolganlariga e’tibor bermasa ham bo‘lishini aytgan.

Izoh qoldirishdan avval, qoidalar bilan tanishib oling: http://dy.uz/QbkeZ

Boshqa yangiliklar