OAV eronlik yadroshunosning o‘ldirilishi bilan bog‘liq tafsilotlarni ma’lum qildi

G‘arb OAVlari tomonidan Eron yadro dasturi rahbari deb atalgan yadroshunos olim Muhsin Faxrizoda masofadan boshqarilgan qurol orqali o‘ldirilgan. Bu haqda Eronning Fars yangiliklar agentligi xabar berdi, deb yozadi “RBK”.

Qotillik 27-noyabr kuni ertalab, Faxrizoda rafiqasi bilan birga Eron shimolidagi Mazenderan viloyatida joylashgan Rostamkola shahridan chiqib, Absard aholi punktiga qarab yo‘l olganida sodir etilgan, deb yozadi Fars. Olim zirhli avtomobilda bo‘lgan, unga o‘z soqchilari xizmatining uchta mashinasi hamrohlik qilgan. Mashinalardan biri oldinga chiqib, vaziyatni tekshirish uchun uzoqlashib ketgan. Shu payt Faxrizodaning avtomobiliga bir nechta o‘q kelib teggan, olim esa mashina nimagadir to‘qnashdi yoki dvigatel bilan muammo yuzaga keldi, deb o‘ylab, mashinadan chiqqan. Shundan keyin olimning avtomobilidan 150 metr uzoqlikdagi Nissan mashinasidan masofadan turib boshqarilgan avtomatik o‘qotar quroldan o‘t ochilgan.

Fars ma’lumotlariga ko‘ra, ikkita o‘q Faxrizodaning yonboshiga, bittasi beliga teggan, oqibatda orqa miya shikastlangan. Olimni tansoqchisi o‘z tanasi bilan to‘sgan, unga ham bir nechta o‘q teggan. Shundan so‘ng Nissan portlab ketgan. Qotillik sodir etilgan joyda er-xotin Faxrizoda va soqchilardan boshqa hech kim bo‘lmagan, deb yozadi agentlik. O‘q otilgan Nissan egasi 29-oktabr kuni mamlakatdan chiqib ketgan.

Qotillik yuz bergan kuni voqea joyida kamida bir marta portlash ovozi eshitilgani, keyin esa Faxrizodaning mashinasi o‘qqa tutilgani xabar berilgan edi. Olim kasalxonaga olib borilgan, u yerda vafot etgan.

Eron hukumati Faxrizodaning o‘ldirilishiga keskin munosabat bildirdi. Eron oliy yetakchisi maslahatchisi Husayn Dehqon qotillikda aybdorlarga qat’iy javob chorasi ko‘rilishini aytdi va to‘liq ko‘lamda urush boshlash maqsadida Eronga bosimni kuchaytirishga harakat qilishayotganini ma’lum qildi. Mamlakat tashqi ishlar vaziri Javod Zarif xalqaro hamjamiyatni “davlat terror akti”ni qoralashga chaqirdi va qotillikka Isroil aloqador bo‘lishi mumkinligini aytdi. Keyinroq The New York Times gazetasi o‘z manbalariga tayanib, AQSh razvedka xizmatlari ham shunday versiya tarafdori ekanligi haqida xabar berdi. Agentlik hamsuhbatlariga ko‘ra, Faxrizoda uzoq vaqt davomida Isroilning “Mossad” siyosiy razvedkasi nishoni bo‘lib kelgan. Oq uy va MRB bu masala bo‘yicha gazetaga izoh berishdan bosh tortdi.

Faxrizoda Eron yadro dasturining yetakchi ishlab chiqaruvchilardan biri edi, 2018-yilda Isroil bosh vaziri Binyamin Netanyaxu olimni Tehronning barcha yadro loyihasining rahbari ekanligini aytgan. OAVlar uni “Eronlik Oppengeymer” va “Eron bombasining otasi” deb atagan. Qayd etish joizki, Eronda yadro quroli hozircha yaratilmagan.