Қирғизистон Олий суди «қонундаги ўғри» Азиз Батукаевнинг ноқонуний озод қилиниши билан боғлиқ иш юзасидан иккита инстанция томонидан чиқарилган ҳукмларни бекор қилди. Бу ҳақда Asia Plus хабар берди.
Асосий айбланувчиси Қирғизистоннинг собиқ президенти Алмазбек Атамбаев бўлган иш Бишкек шаҳрининг Биринчи май тумани судига қайтадан кўриб чиқиш учун жўнатилган. Атамбаевга нисбатан 2020 йилнинг 23 май куни юқори нуфузга эга жиноятчини озод қилганлик учун 11 йиллик қамоқ жазоси тайинланган эди. Август ойида эса Бишкек шаҳар суди ҳайъати бу ҳукмни тасдиқлаган.
Иш бўйича собиқ президентдан ташқари яна учун жалб қилинган: шифокор Абдуҳалим Раимжонов, собиқ бош прокурор Индира Жолдубаева ва жазони ижро этиш давлат хизмати раисининг собиқ маслаҳатчиси Калибек Качкиналиев.
Собиқ маслаҳатчи ҳибсда сақлангани ҳисобидан икки йилга озодликдан маҳрум қилиш жазосини олган. Жолдубаева 5 миллион сом (66,7 минг доллар) жаримага тортилган. Шифокор эса жиноятнинг муддати ўтганлиги сабабли жазодан қутулиб қолган.
2006 йилда «қонундаги ўғри» Азиз Батукаев Бишкек атрофидаги жазони ижро этиш муассасаларидан бирида оммавий тартибсизликлар уюштиргани учун 16 йилу 8 ой муддатга озодликдан маҳрум қилинган. Тартибсизлик вақтида депутат Тиничбек Акматбаев, Жазони ижро этиш бош бошқармаси бошлиғи Икматулла Пўлатов ва икки нафар парламент ходими ўлдирилган.
2013 йилда Батукаев тиббий комиссиянинг унга қўйилган сўнгги даражадаги қон саратони ташхиси асосида қамоқдан озод қилинган. Шундан сўнг у дарҳол мамлакатни тарк этган ва ўзининг тарихий ватани Чеченистонга кетган. Кўп ўтмай тиббий ҳужжатларнинг қалбаки эканлиги маълум бўлди, бироқ Қирғизистон расмийлари Батукаевни орқага қайтаришга муваффақ бўлмаган.
Эслатиб ўтамиз, Алмазбек Атамбаев 2020 йилнинг июнь ойида 11 йиллик қамоқ жазосига ҳукм қилинганди. У Қирғизистон Миллий хавфсизлик давлат қўмитасининг тергов изоляторида сақланаётган эди. Бишкекда 5 октябрдан 6 октябрга ўтар кечаси юз берган тартибсизликлар чоғида Атамбаев озод қилинди. У 9 октябрь куни Бишкекдаги намойишлар бўлаётган марказий майдонга чиқди, 10 октябрь куни эса тартибсизликлар ташкил қилиш айби билан яна қўлга олинганди. Шундан сўнг Атамбаев Бишкекдаги 1-сонли тергов изоляторига жойлаштирилгани ва у ерда очлик эълон қилгани ҳақида хабар берилганди.
Изоҳ (0)