Qirg‘iziston YeOIIga a’zo bo‘lmagan mamlakatlarga qoramol eksportini taqiqladi
Qirg‘iziston hukumati qishloq xo‘jaligi mahsulotlarining ayrim turlarini Yevrosiyo iqtisodiy ittifoqi bojxona hududidan tashqariga olib chiqishga vaqtinchalik taqiq joriy etish to‘g‘risidagi qaror qabul qilgan. Bu haqda Veterinariya va chorvachilikni rivojlantirish davlat qo‘mitasining 23-noyabr kuni Markaziy bankka yuborgan xatiga tayanib, Telegram’dagi “Bank va mijoz” kanalida ma’lum qilindi.
“Olingan ma’lumotlarga ko‘ra, Qirg‘iziston hukumatining 2020-yil 19-noyabrdagi ‘Qirg‘iziston Respublikasidan qishloq xo‘jaligi mahsulotlarining ayrim turlarini Yevrosiyo iqtisodiy ittifoqi bojxona hududidan tashqariga olib chiqishga (eksportga) vaqtinchalik taqiq joriy etish to‘g‘risida’gi qarori qabul qilingan.
Qarorga muvofiq, qishloq xo‘jaligi mahsulotlarining ayrim turlarini, shu jumladan, tirik qoramollar, qo‘y va echkilarni 6 oy muddat davomida eksport qilishga vaqtinchalik taqiq joriy qilingan”, — deyiladi qo‘mita xatida.
“Yuqoridagilardan kelib chiqib hamda iqtisodiy muammolar va kutilmagan zararlarning oldini olishda ko‘maklashish maqsadida Qirg‘izistondan qaror ilovasida keltirilgan chorvachilik tovarlarini, shu jumladan, qoramol, qo‘y va echkilarni olib kelish bo‘yicha O‘zbekiston xo‘jalik yurituvchi subyektlari tomonidan imzolangan import shartnomalarga muvofiq xorijiy hamkorlarga to‘lovlarni amalga oshirmaslik bo‘yicha respublikada faoliyat yuritayotgan tijorat banklariga tegishli ko‘rsatmalar berilishini maqsadga muvofiq deb hisoblaymiz”, — deya qo‘mita tijorat banklarini ogohlantirgan.
Eslatib o‘tamiz, noyabr o‘rtalarida Qirg‘iziston O‘zbekiston sabab qoramol eksportini cheklashi mumkinligi to‘g‘risida xabar berilgandi. Bunga Qozog‘iston tomonidan o‘rnatilgan taqiq bois O‘zbekiston va Tojikiston tomonlari qoramollarni ommaviy ravishda Qirg‘izistondan sotib olishni boshlagani va narxlar ko‘tarilib ketgani sabab qilib ko‘rsatilgan edi.
Avvalroq Rossiya Farg‘onadan pomidor va qalampir olib kirishga taqiq qo‘ygani ma’lum bo‘lgandi.
