O‘zbekiston Ichki ishlar vazirligi va UzCard firibgarlar fuqarolarning plastik kartalaridan pul yechib olish holatlari ko‘paygani sababli bir qator ehtiyot choralari haqida ma’lumot berib o‘tdi.
“Plastik kartalardan foydalanish yanada xavfsiz va texnik jihatdan mukammal jarayonga aylanib bormoqda, lekin firibgarlar taslim bo‘lmayapti: ular insonlarning ishonchlaridan va kartalarni ishlatishning asosiy qoidalarini bilmasliklaridan foydalanmoqda”, – deyiladi vazirlik xabarida.
Ta’kidlanishicha, banklar va qonunni muhofaza qiluvchi organlar muntazam ravishda pulidan ehtiyotsizlik oqibatida mahrum bo‘lgan fuqarolardan arizalarni qabul qilmoqda. Shu sababli firibgarlar qanday usullardan foydalanishi va ularning tuzog‘iga qanday qilib tushmaslikni uchun quyidagi maslahatlar berildi.
Shuningdek, fuqarolarni firibgarlardan himoya qilish uchun quyidagi tavsiyalarga qat’iy rioya qilish so‘ralgan:
- O‘z kartangiz PIN-kodini begonalarga aytmang;
- Tekshirish uchun SMS tasdiq kodini hech kimga ko‘rsatmang;
- Shubhali shaxslarga pul o‘tkazmang;
- Ijtimoiy tarmoqlarga 16 xonali raqamlari ko‘rinib turgan kartangiz suratini joylashtirmang.
Shu bilan birga, firibgarlar turli narsalarni bahona qilib, o‘zlarini bank yoki UzCard xodimlari bo‘lib tanishtirishlari mumkin. Agarda bunday qo‘ng‘iroq kelib tushgan bo‘lsa, e’tibor bermaslik so‘ralgan.
Avvalroq Navoiyda o‘zgalarning plastik kartasidan 20 mln so‘mga yaqin mablag‘ni o‘zlashtirgan shaxs Buxoroda, Jizzaxda bankomatdagi pullarni o‘g‘irlamoqchi bo‘lgan yigit hamda Farg‘onada tanishining plastik kartasidan 2 mln so‘mdan ortiq pul yechib olgan shaxs qo‘lga olingani haqida xabar berilgandi.
Izoh (0)