Sherzod Shermatov o‘quvchilari OTMga kira olmagan maktablar soni 2020-yilda 3 barobarga kamayganini ma’lum qildi

O‘zbekiston xalq ta’limi vaziri Sherzod Shermatov 2020/2021-o‘quv yilida o‘quvchilari oliy ta’lim muassasalariga o‘qishga kirmagan maktablar soni 2019-yilga nisbatan uch barobarga kamayganini ma’lum qildi.

Sherzod Shermatovning ma’lumot berishicha, o‘qishga hujjat topshirgan 1,5 million abituriyentning atigi 23 foizi 2020-yildagi maktab bitiruvchilari bo‘lgan bo‘lsa, ular davlat granti kvotasining 50 foizini egalladi. “Qolgan 77 foiz abituriyentni tashkil etgan litsey, kollej bitiruvchilari yoki avvalgi yilgi bitiruvchilar ham OTMga harakat qilgan, repetitorga borgan, lekin ularning umumiy natijasi maktab bitiruvchilarinikidan anchagina orqada bo‘ldi”, - dedi vazir.

Vazirlik rahbarining bildirishicha, oliy ta’limga birorta ham o‘quvchisi kirmagan maktablar soni 3 barobarga kamaydi, ya’ni 2019-yida ularning soni 2126 ta edi, 2020-yilda esa 692 taga tushdi. “Bunga ham o‘tgan yildan bunday maktab rahbarlarini lavozimiga loyiqligini jiddiy ko‘rib chiqish boshlangani katta turtki bo‘ldi”, — deb ta’kidlagan Sherzod Shermatov.

“Endi buyog‘iga direktorlarimiz va maktab jamoasi faqat natijaga harakat qilishi kerak. Natija — bu bitiruvchilarning hayotda muvaffaqiyatga erishishi. Ularning bir qismi o‘qishning keyingi bosqichiga o‘tsa, keyingi qismi o‘z ishini topib ketishidir. O‘qishga ham kira olmasa, ish ham topa olmasa, keyinchalik yoshlarimiz hayotda qiynalib qolishadi. Shu sababli maktab davridagi vaqtini aynan shu natijaga yo‘naltirishi, shu jumladan, ota-onalar bilan hamkorlikni kuchaytirishi kerak”, — deb yozgan vazir.

Xalq ta’limi vazirining ta’kidlashicha, Xorazm, Navoiy, Sirdaryo va Qashqadaryo viloyatlaridagi yaxshi ko‘rsatkichga ega va umuman natija ko‘rsatmagan maktablarni solishtirganda, asosiy farq aynan direktor va maktab jamoasining o‘z kasbiga bo‘lgan fidoyiligi tufayli yuzaga kelayotgani ma’lum bo‘lgan.

“Solishtirganda ko‘rinadiki, aksariyat yomon ko‘rsatkichga ega maktablarning moddiy texnik holati yaxshi ko‘rsatkichga ega bo‘lgan maktabnikidan ancha yaxshi bo‘lib chiqayapti. Eskichasiga faqat maktabning tashqi ko‘rinishiga qarab direktorga baho berilganida, aksincha bular yaxshi bo‘lib chiqardi va yaxshi natija ko‘rsatgan direktorga esa maktabining ko‘rinishi yaxshi bo‘lmagani sababli chora ko‘rilishi mumkin edi”, — deya qo‘shimcha qilgan vazir.