Ukraina prezidenti Vladimir Zelenskiy mamlakatda ko‘p fuqarolik institutini joriy etish to‘g‘risidagi qonunni imzoladi. Bu haqda u o‘zining Telegram kanalida xabar berdi.
Zelenskiy qonunni amalga oshirish uchun barcha qonunosti hujjatlarini zudlik bilan ishlab chiqish va qabul qilishni topshirganini ta’kidlagan. Shuningdek, ko‘p fuqarolikka ruxsat beriladigan davlatlar ro‘yxatini ishlab chiqish boshlanishini ma’lum qilgan.
Endilikda muayyan shartlarga ko‘ra, ukrainaliklar bir vaqtning o‘zida ikki yoki undan ortiq davlat pasportiga ega bo‘lishi mumkin bo‘ladi.
Hujjatga ko‘ra, Ukraina fuqarolari uchun Ukraina fuqaroligini yo‘qotish xavfisiz chet el fuqaroligiga ega bo‘lish masalasi hal etiladi (boshqa davlat hukumat tomonidan belgilangan davlatlar ro‘yxatiga kiritilgan taqdirda).
Bundan tashqari, Ukraina fuqaroligidan voz kechmagan holda boshqa davlat fuqaroligini rasman olish huquqi beriladi (agar boshqa davlat hukumat tomonidan belgilangan davlatlar ro‘yxatiga kiritilgan bo‘lsa).
Boshqa davlatlar fuqarolariga esa kelib chiqishi ukrainalik bo‘lgan shaxslar uchun qisqartirilgan tartibda Ukraina fuqaroligini olish huquqi beriladi.
Yangi qonun Ukrainada harbiy xizmatni o‘tayotgan xorijliklar uchun fuqarolik olishning soddalashtirilgan tartibini, shuningdek, o‘z mamlakatlarida siyosiy sabablarga ko‘ra ta’qib qilinayotgan shaxslarga Ukraina fuqaroligini olish huquqini nazarda tutadi.
Ukrainada ko‘p fuqarolik instituti nima uchun joriy etildi?
Hukumatning ta’kidlashicha, hujjat demografik va xavfsizlik muammolariga, shuningdek, davlat tashqarisidagi millionlab ukrainaliklar bilan aloqani tiklash va saqlab qolish zaruratiga javob sifatida ishlab chiqilgan.
Ukraina Oliy Radasining gumanitar va axborot siyosati bo‘yicha rais o‘rinbosari va xalq deputati Yevgeniya Kravchukning aytishicha, ko‘p fuqarolik to‘g‘risidagi qonun amalda ikkita pasportga ega bo‘lgan ukrainaliklarni qonunbuzar qilmaydi.
“Juda ko‘p ukrainaliklar 10-20 yil oldin mamlakatdan chiqib ketib, boshqa davlatlar fuqaroligini olishgan. Qabul qilingan hujjat bunday shaxslarga Ukraina pasportini saqlab qolish, uni qayta rasmiylashtirish va Ukraina fuqarosi bo‘lib qolish imkonini beradi”, deydi Kravchuk.
Uning so‘zlariga ko‘ra, hujjat urush tufayli boshpana izlayotgan Ukrainadan majburiy ko‘chib ketganlarga Ukraina bilan aloqani saqlab qolishga yordam beradi.
Bundan tashqari, chet elda tug‘ilgan kichkina ukrainaliklarning ota-onalari endi fuqarolikni tanlashga majbur bo‘lmaydi. Ularda Ukraina pasportiga ham, oilani qabul qilgan mamlakat pasportiga ham ega bo‘lish imkoniyati paydo bo‘ladi.
Shuningdek, hech qachon Ukraina fuqaroligiga ega bo‘lmagan etnik ukrainaliklar uchun tartib soddalashtiriladi. Ular fuqarolikni olishdan oldin Ukrainada kamida bir yil yashashi shart bo‘ladi.
Izoh (0)