Andijonda giyohvandlik vositasi sotuvchi shaxslar zanjiri uzildi, deb xabar bermoqda IIV Tergov departamenti.
Xabarda aytilishicha, 14-avgust kuni soat 18:00 da Andijon shahri bo‘yicha IIO FMB xodimlari tomonidan “Qoradori 2020” tadbiri o‘tkazilgan. Tadbir davomida shaharning Boburshoh ko‘chasida joylashgan “Ulfatlar” choyxonasi ro‘parasida 20 yoshli Javohir A., 0,81 gramm tarkibida “tetrogidrokanabinol” giyohvand vositasini saqlovchi “gashish” giyohvand moddasini 500 ming so‘mga sotgan vaqtida ushlangan.
Javohir A. uni 35 yoshli Nodirbek A.dan 250 000 so‘mga sotib olganligini ma’lum qilgan. Uning ko‘rsatmasiga asosan Nodirbek A. o‘zining Spark’ida Lermontov ko‘chasida ketayotganida to‘xtatilib, avtomashina xolislar ishtirokida ko‘zdan kechirilgan. Tekshiruvda mashina old chap tomon eshigini ichki cho‘ntagida turgan sigaret qutisiga solingan 1,15 gramm, avtomashina o‘ng oldi tomon oyoq qo‘yish joyidan 1,92 gramm “gashish” giyohvand moddasi va uning yonidan tadbirda foydalangan raqamlangan 5000 so‘mlik kupyuradagi pullardan 2 donasi borligi aniqlanib, tegishli tartibda hujjatlashtirib olingan.
Nodirbek A. bu moddani tanishi 39 yoshli Abdusalom M.dan 365 000 so‘mga sotib olganligini ma’lum qilgach, tadbir davom ettirilgan va Abdusalom M. kiyimlari xolislar ishtirokida ko‘zdan kechirilganida, shimining oldi o‘ng cho‘ntagiga solingan sigaret qutisi ichidan polietilen paketga o‘ralgan 0,22 gramm va chap oyog‘iga yopishtirilgan polietilen parchasiga o‘ralgan 1,02 gramm “gashish” giyohvand vositasi aniqlanib, kelgusida tekshirib ko‘rishlik uchun olingan.
Abdusalom M.dan ushbu giyohvand moddalarini kimdan olganligi so‘ralganida, Javohir A.,dan, Nodirbek A.,ning avtomashinasidan va uning yonidan olingan jami 5.12 gramm ko‘p miqdordagi “gashish” giyohvand moddasini fuqaro 54 yoshli Dilmurat A.dan jami 1.025.000 so‘mga sotib olganligini ma’lum qilgan.
Ushbu ko‘rsatmaga asosan Dilmurod A.ni yashab kelayotgan Andijon shahar Oxunboboyev ko‘chasida uyini oldida to‘xtatib, kiyim boshlari ko‘zdan kechirilganida, yonida jami 553 000 so‘m pullari borligi, ushbu pullar orasida tadbirda foydalangan raqamlangan 5000 so‘m kupyuradagi pullardan 2 donasi borligi aniqlanib, xolislar ishtirokida tegishli tartibda rasmiylashtirib olingan.
Mazkur jinoyat ishi Andijon shahri bo‘yicha IIO FMB 3-son IIB huzuridagi Tergov bo‘linmasi tomonidan Javohir A.ga nisbatan Jinoyat kodeksining 273-moddasi 2-qismi (giyohvandlik vositalarini o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan, Nodirbek A., va Abdusalom M.larga nisbatan JKning 273-moddasi 3-qismi “b” bandi bilan va Dilmurod A.ga nisbatan JKning 273-moddasi 5-qismi (giyohvandlik vositalarini ko‘p miqdorda qonunga xilof ravishda sotish) bilan jinoyat ishi qo‘zg‘atilgan.
Avvalroq Toshkentda Malibu salonidan giyohvand modda topilgani, Buxoroda salkam 1,5 kilolik giyohvand moddani sotish maqsadida saqlab kelayotgan jinoiy guruh qo‘lga olingani, Yakkabog‘da 72 yoshli otaxonning uyidan qariyb 2 kg giyohvand vosita aniqlangani, O‘zbekistonga kirib kelgan poyezddan salkam 173 kilogramm narkotik topilgani haqida xabar berilgandi.
Izoh (0)