Namangan viloyatida bugungi kunda aholi xonadonlarining 30 foizi tabiiy gaz, 70 foizi suyultirilgan gaz ta’minoti bilan foydalanmoqda. Bu haqda “Hududgaz Namangan” gaz ta’minoti filiali direktori Shavkatjon Otaxanov ma’lum qildi, deya xabar beradi “Daryo” muxbiri Azizbek Abduvaliyev.

Foto: “Daryo”

Jurnalist va blogerlar uchun tashkil etilgan matbuot anjumanida qayd etilishicha, noyabr oyining ikkinchi yarmida ob-havoning keskin sovib ketishi sababli tabiiy gaz iste’molining ortishi hamda magistral gaz tarmoqda gaz kelishi bosimining pasayishi oqibatida viloyatning 205 ta mahallasidagi 55 mingga yaqin xonadonda tabiiy gaz ta’minotida uzilishlar sodir bo‘lmoqda.

Viloyatdagi tabiiy gazga ulangan jami xonadonlar soni esa 176 mingni tashkil etadi.

Foto: “Daryo”

“Magistral quvurlarda gaz bosimi 6-7 atmosfera bo‘lsa ta’minotda muammo yuzaga kelmaydi. Hozirgi kunda, afsuski, bu ko‘rsatkich 1,0-2,5 atmosferani tashkil etmoqda”, — deydi Sh.Otaxanov.

Otaxanovga ko‘ra, ayni paytda Turkmanistondan gaz import qilish boshlangan va buning hisobiga Namanganda ham holat ijobiy tomonga o‘zgarishi hamda gaz bosimi ko‘tarilishi kutilmoqda.

Foto: “Daryo”

Ta’kidlanishicha, viloyatda 99 ta avtomobillarga gaz to‘ldirish kompressor shoxobchasi bo‘lib, ularga kuniga 861 ming kub metr gaz yetkazib berilishi rejalashtirilgan. Biroq gaz bosimining pastligi va shoxobchalar 12 soatlik rejimga o‘tkazilgani sababli bu ko‘rsatkich hozirda 318 ming kub metrni tashkil etmoqda.

Ma’lumot uchun, hukumat qarori bilan Namangan viloyatiga o‘tgan yilga nisbatan 15 ming tonna ko‘p suyultirilgan gaz ajratilgan. Bundan 7 ming tonnasi noyabr-dekabr oylariga, 8 ming tonnasi esa kelgusi yilning yanvar, fevral va mart oylariga mo‘ljallangan.