Rossiya veterinariya va fitosanitariya nazorati bo‘yicha federal xizmati 26-noyabr kuni Farg‘ona viloyatida yetishtiriladigan pomidor va qalampir mahsulotlarining mamlakat hududiga olib kirilishiga taqiq qo‘ygani to‘g‘risida xabar berilgandi. Spot’ning O‘zbekiston Investitsiyalar va tashqi savdo vazirligiga tayanib yozishicha, ushbu masala yuzasidan hozirda “Rosselxoznadzor” bilan konsultatsiya o‘tkazilmoqda.
Rossiya tomoniga ko‘ra, Farg‘ona viloyatida yetishtirilgan pomidorda jigarrang burishish virusi (Tomato brown rugose fruit virus —ToBRFV) aniqlanganligi sababli cheklovlar joriy etilgan.
“Hozirgi vaqtda Vazirlar Mahkamasi huzuridagi O‘simliklar karantini davlat inspeksiyasi va O‘zbekistonning Rossiyadagi elchixonasi bilan birgalikda ‘Rosselxoznadzor’ bilan mazkur masala bo‘yicha maslahatlashuvlar o‘tkazilmoqda”, — deyiladi xabarda.
Qayd etilishicha, “Rosselxoznadzor” tomonidan joriy etilgan taqiqlar O‘zbekistonning barcha ishlab chiqaruvchilariga nisbatan qo‘llanilmaydi va faqat Farg‘ona viloyatidan keltirilgan mahsulotlarga tegishlidir.
“Rossiya tomoni bilan maslahatlashuvlar davom etmoqda. Taqiqlarni yaqin vaqtlarda bekor qilish bo‘yicha choralar ko‘rilmoqda”, — deyiladi xabarda.
Avvalroq Qirg‘izistonda YeOIIga a’zo bo‘lmagan mamlakatlarga qoramol eksportini taqiqlagani to‘g‘risida xabar berilgandi.
Izoh (0)