Ўзбекистон Ички ишлар вазирлиги ва UzCard фирибгарлар фуқароларнинг пластик карталаридан пул ечиб олиш ҳолатлари кўпайгани сабабли бир қатор эҳтиёт чоралари ҳақида маълумот бериб ўтди.
«Пластик карталардан фойдаланиш янада хавфсиз ва техник жиҳатдан мукаммал жараёнга айланиб бормоқда, лекин фирибгарлар таслим бўлмаяпти: улар инсонларнинг ишончларидан ва карталарни ишлатишнинг асосий қоидаларини билмасликларидан фойдаланмоқда», – дейилади вазирлик хабарида.
Таъкидланишича, банклар ва қонунни муҳофаза қилувчи органлар мунтазам равишда пулидан эҳтиётсизлик оқибатида маҳрум бўлган фуқаролардан аризаларни қабул қилмоқда. Шу сабабли фирибгарлар қандай усуллардан фойдаланиши ва уларнинг тузоғига қандай қилиб тушмасликни учун қуйидаги маслаҳатлар берилди.
Шунингдек, фуқароларни фирибгарлардан ҳимоя қилиш учун қуйидаги тавсияларга қатъий риоя қилиш сўралган:
- Ўз картангиз PIN-кодини бегоналарга айтманг;
- Текшириш учун SMS тасдиқ кодини ҳеч кимга кўрсатманг;
- Шубҳали шахсларга пул ўтказманг;
- Ижтимоий тармоқларга 16 хонали рақамлари кўриниб турган картангиз суратини жойлаштирманг.
Шу билан бирга, фирибгарлар турли нарсаларни баҳона қилиб, ўзларини банк ёки UzCard ходимлари бўлиб таништиришлари мумкин. Агарда бундай қўнғироқ келиб тушган бўлса, эътибор бермаслик сўралган.
Аввалроқ Навоийда ўзгаларнинг пластик картасидан 20 млн сўмга яқин маблағни ўзлаштирган шахс Бухорода, Жиззахда банкоматдаги пулларни ўғирламоқчи бўлган йигит ҳамда Фарғонада танишининг пластик картасидан 2 млн сўмдан ортиқ пул ечиб олган шахс қўлга олингани ҳақида хабар берилганди.
Изоҳ (0)