Xalq ta’limi vaziri Sherzod Shermatov Qashqadaryo viloyat xalq ta’limi boshqarmasiga yangi rahbar tayinlab, unga ishni boshqarmani tozalashdan boshlash kerakligini bildirgan, deya xabar berdi “Daryo” muxbiri.
Ma’lum bo‘lishicha, xalq ta’limi vaziri ishtirokidagi yig‘ilishda vazir viloyat xalq ta’limi boshqarmasining xodimlar bilan ishlovchi mas’ulini so‘ragan. Yig‘ilishga kelmaganini va kasal edi degan gapni eshitgach, “Ha, u kasal bo‘ladi. Va oxiri boshqa narsa bilan tugaydi — prokuratura bilan”, degan.
Vazir boshqarmaning yangi rahbari To‘lqin Karimovga ishini boshqarmaning xodimlar bilan ishlovchi mas’ulini ishdan olish bilan boshlashi kerakligini bildirgan.
“Birinchi navbatda ‘otdelkadr’ni ishdan olish kerak. Xullas, avvalo ‘oblono’ning o‘zini tozalash kerak. Keyin o‘quvchisi o‘qishga kirolmagan 200 ta maktabni o‘rganish kerak. Maktabga direktorlik qilayotganiga endi bir oy bo‘lgan bo‘lsa, unga tegish kerak emas. Lekin 10 yillab direktor bo‘lib, natija ko‘rsatmaganlarni olish kerak. Biz o‘sha kuni 20 tasini ishdan oldik”, — dedi Sherzod Shermatov.
Xalq ta’limi vazirining aytishicha, u o‘quvchilari OTMga kirolmagan 20 nafar maktab direktorini ishdan olishdan avval, ularga o‘z xohishi bilan ariza yozishni taklif qilgan.
“10-15 yil maktabga rahbarlik qilib, hech qanday natijaga erishilmaganini his qilyapsizlarmi deb so‘raganimizda, hech qaysi direktor hech narsa demadi. Hatto mas’uliyatni his qilmayapti”, — dedi vazir.
Vazir Sherzod Shermatov To‘lqin Karimovga ishlayotgan, yaxshi natija ko‘rsatayotgan maktablarni tekshirish an’anasini to‘xtatib, ishlamayotgan, natija ko‘rsatmayotgan maktablarni tekshirish ishlarini avj oldirish kerakligini tayinlagan.
“Ishlayotgan, yaxshi maktabga xalaqit qilishimiz kerak emas, biz har kuni, o‘sha ‘oblono’ va ‘rayono’ning xodimi ham har kuni eng yomon maktabga borishimiz kerak. Eng yomoni ham o‘zi sekin-sekin ko‘tarilib boraveradi. Yomonni yaxshi qilsak bo‘ldi, yaxshini yomon qilib berishimiz kerak emas”, — degan vazir.
Eslatib o‘tamiz, Sherzod Shermatov ishtirokidagi yig‘ilishda Qashqadaryo viloyat xalq ta’limi boshqarmasiga ayni kunga qadar Shahrisabz shahrini boshqarib kelgan To‘lqin Karimov tayinlangani haqida xabar berilgandi. Sobiq boshliq esa quruq va balandparvoz gaplar gapirib, davlat rahbarining ko‘nglini xira qilgani uchun ishdan olingani ma’lum bo‘ldi.
Izoh (0)