Ўзбекистонда дарахтлар ва буталар қимматбаҳо навларини кесилишига жорий қилинган мораторий 2021 йил охиригача узайтирилиши мумкин. «Gazeta.uz»нинг маълум қилишича, Экология ва атроф-муҳитни муҳофаза қилиш давлат қўмитаси бу ҳақда Вазирлар Маҳкамасига тегишли таклиф киритган.
Қўмита вакилининг таъкидлашича, дарахт кесилишига энг катта таъсир қурилиш объектларида учрамоқда. «Қурилиш борки, ҳеч бўлмаганда битта дарахт кесилиш ҳолати учрайди. Мораторийни узайтириш билан бирга, қурилиш объектларига тавсиялар ва талаблар қўйилиши режалаштирилган», — деди қўмита ахборот хизмати раҳбари Абдуллаев Бунёд.
Президентнинг 2019 йил 30 октябрдаги фармони билан давлат ўрмон фондига кирмайдиган дарахтлар ва буталар қимматбаҳо навларининг кесилишига 2019 йил 1 ноябрдан 2020 йил 31 декабрга қадар мораторий жорий этилган эди. Ушбу ҳужжат билан мораторий амал қилиш даврида ваколатли давлат органларига дарахт ва буталар қимматбаҳо навлари кесилишига рухсат бериши ман этилган.
Мораторий амал қилиш муддати тугамасдан дарахтларни ноқонуний кесиш билан боғлиқ бир қанча ҳолатлар қайд этилган эди. Май ойида Сурхондарёда фуқаро автосервис қуриш мақсадида 35 туп қарағай дарахтини кесгани учун 165,5 миллион сўм миқдорида жаримага тортилган.
Июлга келиб Давлат экология қўмитаси Тошкент марказида кўп йиллик чинорлар ноқонуний равишда каллаклаб ташланганини тасдиқлаганди. Воқеа жойига пойтахт ҳокими Жаҳонгир Ортиқхўжаев ҳам ташриф буюриб, муаммони суд орқали ҳал этиш лозимлиги ва ким ноҳақ бўлса, ўша қонун олдида жавоб бериши кераклигини таъкидлаган эди. Июль ойида шу каби ҳолат Нурафшонда ҳам кузатилди. Унда йўл четидаги 37 туп дарахт, шундан 26 туп кўп йиллик чинорлар кесиб ташлангани ва зарар 1,1 миллиард сўмни ташкил этгани аниқланган.
Шу кунларда «Туркистон» саройи атрофидаги дарахтларга белги қўйилгани ва улар кесилиши мумкинлиги ҳақидаги хабарлар ижтимоий тармоқларда кенг муҳокамаларга сабаб бўлган эди. Давлат экология қўмитаси белги қўйилган дарахтлар имкон қадар кесилмаслигини, ўсимлик зараркунандалари ва табиий омиллар таъсирида зарарлангани, турли коммуникацияларга таҳдид солаётган дарахтларга махсус белги қўйилганини маълум қилган эди.
7 ноябрь куни ижтимоий тармоқларда Чилонзор туманидаги Гагарин кўчасида жойлашган дарахтларнинг ноқонуний кесилиш ҳолати бўйича жойлаштирилган пост юзасидан олиб борилган ўрганиш ишларида бир дона чинор дарахти ноқонуний кесилгани аниқланганди. Ўсимлик дунёсига келтирилган зарар 42,9 миллион сўмни ташкил этган.
Изоҳ (0)