Bosh prokuratura huzuridagi Iqtisodiy jinoyatlarga qarshi kurashish departamenti Bektemir tuman aholi bandligiga ko‘maklashish markazi direktorini pora olayotgan paytda ushladi. Bu haqda Bosh prokuratura matbuot xizmati “Daryo”ga ma’lum qildi.

Idora ma’lumotlariga ko‘ra, markaz direktori M.A. fuqaro Sh.A.ning turmush o‘rtog‘ini yuqori lavozimda ishlovchi tanishlari orqali Toshkent shahridagi tug‘ruq komplekslaridan biriga rahbar lavozimini egallashiga yordam berish evaziga firibgarlik yo‘li bilan 30 ming AQSh dollari talab qilgan. M.A shundan 10 ming dollarni olgan vaqtida ashyoviy dalil bilan qo‘lga olindi.

Mazkur holat yuzasidan M.A.ga nisbatan Jinoyat kodeksining 168-moddasi (firibgarlik) 3-qismi va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq bosh prokuror Nig‘matilla Yo‘ldoshev O‘zbekistonda ikki yil ichida salkam 2000 nafar mansabdor shaxs korrupsiyaviy jinoyatlari uchun jinoiy javobgarlikka tortilganini ma’lum qilgandi.