Hashamatli uy, mashinalar va ko‘z-ko‘z qilinmaydigan shaxsiy hayot. “Real”ning “billur oyoq”li yulduzi Eden Azar qanday hayot kechiradi?

“Chelsi”dagi bir necha yillik muvaffaqiyatli mavsumlardan keyin “Real”ga o‘tgan Eden Azar kutilgan o‘yinni namoyish eta olmayapti va mana ikki yildirki, jarohatlar bilan o‘ralashib qolgan. Shunga qaramay, hali unda yetarlicha imkoniyat va vaqt borligi aytilmoqda. Biroq hozir bu haqida emas, balki uning yashash tarzi, oilasi, mashinalari va daromadlari haqida fikr yuritamiz.

Azar qayerda yashaydi?

Eden Azar 2019-yilning 7-iyun kuni “Real”ga ko‘chib o‘tgan bo‘lsa-da, bu vaqtga qadar o‘zi uchun Madriddan uy sotib olishga ulgurgandi. Ko‘pchilik futbolchining Garet Beylning qasriga joylashishini taxmin qilgandi, ammo uelslik futbolchi u paytda jamoani tark etmagandi. Shu tariqa Azar Madridning obro‘li tumanlaridan biri La Finchaga joylashdi. Bu hududda “Real”ning ko‘plab o‘yinchilari istiqomat qiladi, Edenning qo‘shnilari esa Karim Benzema va Rafael Varan.

Azarning uyi ham La Finchadagi boshqa hashamatli qasrlardan aslo farq qilmaydi. Ularning barchasi bir xil dizayn ega bo‘lib,  unda cho‘milish havzasidan tortib to garajgacha barchasi muhayyo qilingan.

Azar qanday mashinalarda yuradi?

Azar o‘z daromadlari va mashinalari bilan maqtanishni xush ko‘rmaydigan kam sonli futbolchilardan biri hisoblanadi. Futbolchining o‘zi bu borada shunday deydi:

“Ha, futbol menga katta pul berdi va men futbol o‘ynash orqali pul ishlashim mumkinligidan xursandman. Lekin bu bilan hech qachon maqtanmayman, chunki bu menga qaraganda kam pul topadiganlarga nisbatan hurmatsizlik bo‘ladi. Mashinam, uyim bor, ko‘p narsaga qodirman, lekin barchasini odamlarga ko‘rsatmayman. O‘zlarining barcha boyliklarini omma oldida namoyish etadigan va samolyotlari bilan maqtanadigan futbolchilar bor. Ammo men oddiy, xalq orasidan chiqqan odamman. Ota-onam menga shunday tarbiya bergan”.

Eden intervyularidan birida birinchi mashinasi qora Mini Cooper bo‘lganligini haqida gapirgandi:

“Bu juda yaxshi edi, ushbu mashinaning omadi kelmagan, chunki men uni yaxshigina charchatib qo‘yganman. Angliyada tez-tez tirbandliklarga tushib qolardim, shuning uchun Mini Cooper ayni muddao edi”.

Shuningdek, uning garajida boshqa bir qator mashinalarni ko‘rish mumkin. Ulardan biri qora rangdagi 110 ming dollarlik Range Rover.

Aynan ushbu modeldan aksariyat boshqa futbolchilar ham foydalanadi. Azarning yana bir avtomobili 310 ming dollarlik Aston Martin Vanquish bo‘lib, Eden aynan ushbu “toychoq”qa o‘zgacha mehr qo‘ygan.

Ushbu modeldan Jeyms Bond josuslar haqidagi filmlardan birida foydalanganini alohida ta’kidlash lozim. Edenning hozircha oxirgi avtomobili Audi R8 bo‘lib turibdi. Uning narxi 155 ming dollarni tashkil qiladi.

Azarning shaxsiy hayoti qanday?

Eden Azar shaxsiy hayotini oshkor qilishni istamaydi. Oilasi bilan birgalikda uni faqat mavsum oxirida, ya’ni taqdirlash marosimlarida ko‘rish mumkin, xolos.

Rafiqasining ismi Natasha Azar bo‘lib, u futbolchining hayotidagi birinchi va yagona ayol. Ular bir maktabda tahsil olgan. Azar “Lill”ga ko‘chib o‘tganidan so‘ng esa Natasha maktabni tamomlab, uning oldiga boradi. Qayd etish joiz, Natashaning biror bir ijtimoiy tarmoqda sahifasi yo‘q. Natasha bolaligida badminton va futbol bilan shug‘ullangan, aynan shu tufayli ham Azar uni yoqtirib qolgan bo‘lsa ajab emas. Juftlik hozirda uch nafar o‘g‘il farzandni voyaga yetkazmoqda.

Azarning do‘stlari kim?

Eden Azarning futbol olamidagi do‘stlari ko‘p emas.“

Chelsi”da o‘ynab yurgan kezlari u Ngolo Kante bilan yaxshi munosabatlarda bo‘lgan, “Real”da esa Karim Benzema bilan tezda do‘st tutindi.

Ularning yonma-yon yashashi ham bunga o‘z ta’sirini o‘tkazgan, albatta. Bundan tashqari har ikkala futbolchi fransuz tilida so‘zlashadi.

Va, albatta, Azarning eng yaqin do‘sti, bu uning ukasi Torgandir. Ular birgalikda Belgiya terma jamoasi sharafini himoya qiladi. Aytishlaricha, Azar barcha sirlarini aynan ukasiga ishonar ekan.

Azar futboldan tashqari yana nimlarga qiziqadi?

Yuqorida aytilganidek, Azar ko‘p vaqtini oilasi bilan o‘tkazadi. Shunga qaramay, u o‘z qiziqishlari uchun ham vaqt topadi. Futbolchi basketbol muxlisi hisoblanadi. Bundan tashqari, o‘yinchi suv transportlarini boshqarishni xush ko‘radi. Shuningdek, u turli xil reklamalarda ham suratga tushib turadi. Tabiiyki, buning uchun u yaxshigina haq oladi.

Azarning daromadi qancha?

Londonda Eden haftasiga 260 ming yevro maosh olardi, bu yiliga 13,5 millionga aylanadi. Biroq Madridga ko‘chib o‘tgach, uning maoshi biroz pasaydi, endilikda uning haftalik daromadi 210 ming yevroga teng. Ushbu holatda Azarning “Real”dagi bir yillik maoshi 11 millionni tashkil qiladi. Eden Azar “Real”da o‘ynash uchun naq 2,5 milliondan voz kechgan.