“Milan” hujumchisi Zlatan Ibragimovich yaqin vaqt ichida jamoasiga yordam bera olmaydi.
39 yoshli shvetsiyalik futbolchi A Seriya 8-turi doirasida “Napoli”ga qarshi o‘yinda (3:1) dublga erishdi va mushak jarohati oldi.
Dastlabki tibbiy ko‘rik xulosalariga ko‘ra, Ibragimovich chap soni mushaklarida muammo yuzaga kelgan. Tiklanish muddatiga qancha ketishi chuqurlashtirilgan tibbiy ko‘rikdan keyin aniq bo‘ladi.
Dastlabki taxminlarga ko‘ra, futbolchi 3-4 hafta maydonga tusha olmaydi.
Shu tariqa Ibragimovich “Milan”ning Yevropa Ligasi guruh bosqichidagi qolgan uchta o‘yinini (“Lill”, “Seltik” va “Sparta”) o‘tkazib yuboradi. Shuningdek, A Seriya doirasida “Fiorentina”, “Sampdoriya” va “Parma”ga qarshi o‘yinlarda ishtirok eta olmaydi.
Bundan tashqari “Milan” yarim himoyachisi Aleksis Salemakersda ham jarohat kuzatilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)