«Челси»даги бир неча йиллик муваффақиятли мавсумлардан кейин «Реал»га ўтган Эден Азар кутилган ўйинни намойиш эта олмаяпти ва мана икки йилдирки, жароҳатлар билан ўралашиб қолган. Шунга қарамай, ҳали унда етарлича имконият ва вақт борлиги айтилмоқда. Бироқ ҳозир бу ҳақида эмас, балки унинг яшаш тарзи, оиласи, машиналари ва даромадлари ҳақида фикр юритамиз.
Азар қаерда яшайди?
Эден Азар 2019 йилнинг 7 июнь куни «Реал»га кўчиб ўтган бўлса-да, бу вақтга қадар ўзи учун Мадриддан уй сотиб олишга улгурганди. Кўпчилик футболчининг Гарет Бэйлнинг қасрига жойлашишини тахмин қилганди, аммо уэлслик футболчи у пайтда жамоани тарк этмаганди. Шу тариқа Азар Мадриднинг обрўли туманларидан бири Ла Финчага жойлашди. Бу ҳудудда «Реал»нинг кўплаб ўйинчилари истиқомат қилади, Эденнинг қўшнилари эса Карим Бензема ва Рафаэл Варан.
Азарнинг уйи ҳам Ла Финчадаги бошқа ҳашаматли қасрлардан асло фарқ қилмайди. Уларнинг барчаси бир хил дизайн эга бўлиб, унда чўмилиш ҳавзасидан тортиб то гаражгача барчаси муҳайё қилинган.
Азар қандай машиналарда юради?
Азар ўз даромадлари ва машиналари билан мақтанишни хуш кўрмайдиган кам сонли футболчилардан бири ҳисобланади. Футболчининг ўзи бу борада шундай дейди:
«Ҳа, футбол менга катта пул берди ва мен футбол ўйнаш орқали пул ишлашим мумкинлигидан хурсандман. Лекин бу билан ҳеч қачон мақтанмайман, чунки бу менга қараганда кам пул топадиганларга нисбатан ҳурматсизлик бўлади. Машинам, уйим бор, кўп нарсага қодирман, лекин барчасини одамларга кўрсатмайман. Ўзларининг барча бойликларини омма олдида намойиш этадиган ва самолётлари билан мақтанадиган футболчилар бор. Аммо мен оддий, халқ орасидан чиққан одамман. Ота-онам менга шундай тарбия берган».
Эден интервьюларидан бирида биринчи машинаси қора Mini Cooper бўлганлигини ҳақида гапирганди:
«Бу жуда яхши эди, ушбу машинанинг омади келмаган, чунки мен уни яхшигина чарчатиб қўйганман. Англияда тез-тез тирбандликларга тушиб қолардим, шунинг учун Mini Cooper айни муддао эди».
Шунингдек, унинг гаражида бошқа бир қатор машиналарни кўриш мумкин. Улардан бири қора рангдаги 110 минг долларлик Range Rover.
Айнан ушбу моделдан аксарият бошқа футболчилар ҳам фойдаланади. Азарнинг яна бир автомобили 310 минг долларлик Aston Маrtin Vanquish бўлиб, Эден айнан ушбу «тойчоқ»қа ўзгача меҳр қўйган.
Ушбу моделдан Жеймс Бонд жосуслар ҳақидаги фильмлардан бирида фойдаланганини алоҳида таъкидлаш лозим. Эденнинг ҳозирча охирги автомобили Audi R8 бўлиб турибди. Унинг нархи 155 минг долларни ташкил қилади.
Азарнинг шахсий ҳаёти қандай?
Эден Азар шахсий ҳаётини ошкор қилишни истамайди. Оиласи билан биргаликда уни фақат мавсум охирида, яъни тақдирлаш маросимларида кўриш мумкин, холос.
Рафиқасининг исми Наташа Азар бўлиб, у футболчининг ҳаётидаги биринчи ва ягона аёл. Улар бир мактабда таҳсил олган. Азар «Лилль»га кўчиб ўтганидан сўнг эса Наташа мактабни тамомлаб, унинг олдига боради. Қайд этиш жоиз, Наташанинг бирор бир ижтимоий тармоқда саҳифаси йўқ. Наташа болалигида бадминтон ва футбол билан шуғулланган, айнан шу туфайли ҳам Азар уни ёқтириб қолган бўлса ажаб эмас. Жуфтлик ҳозирда уч нафар ўғил фарзандни вояга етказмоқда.
Азарнинг дўстлари ким?
Эден Азарнинг футбол оламидаги дўстлари кўп эмас.«
Челси»да ўйнаб юрган кезлари у Нголо Канте билан яхши муносабатларда бўлган, «Реал»да эса Карим Бензема билан тезда дўст тутинди.
Уларнинг ёнма-ён яшаши ҳам бунга ўз таъсирини ўтказган, албатта. Бундан ташқари ҳар иккала футболчи француз тилида сўзлашади.
Ва, албатта, Азарнинг энг яқин дўсти, бу унинг укаси Торгандир. Улар биргаликда Бельгия терма жамоаси шарафини ҳимоя қилади. Айтишларича, Азар барча сирларини айнан укасига ишонар экан.
Азар футболдан ташқари яна нимларга қизиқади?
Юқорида айтилганидек, Азар кўп вақтини оиласи билан ўтказади. Шунга қарамай, у ўз қизиқишлари учун ҳам вақт топади. Футболчи баскетбол мухлиси ҳисобланади. Бундан ташқари, ўйинчи сув транспортларини бошқаришни хуш кўради. Шунингдек, у турли хил рекламаларда ҳам суратга тушиб туради. Табиийки, бунинг учун у яхшигина ҳақ олади.
Азарнинг даромади қанча?
Лондонда Эден ҳафтасига 260 минг евро маош оларди, бу йилига 13,5 миллионга айланади. Бироқ Мадридга кўчиб ўтгач, унинг маоши бироз пасайди, эндиликда унинг ҳафталик даромади 210 минг еврога тенг. Ушбу ҳолатда Азарнинг «Реал»даги бир йиллик маоши 11 миллионни ташкил қилади. Эден Азар «Реал»да ўйнаш учун нақ 2,5 миллиондан воз кечган.
Бошқа мақолалар:
Изоҳ (0)