Shanxaydagi aeroport xodimida koronavirus aniqlangani sabab tartibsizlik yuzaga keldi. Yo‘lovchilar aeroport binosidan qochib chiqib ketishga urindi (video)

Shanxayning Pudun aeroporti xodimida koronavirus aniqlangani sabab tartibsizlik yuzaga keldi. Odamlar izolyatsiyaga tushib qolmaslik uchun aeroport binosidan chiqib ketishga uringan, deb yozadi Telegram’dagi Mash kanali.

Ma’lumotlarga ko‘ra, aeroport xodimlaridan birida koronavirus aniqlangani sabab rahbariyat ommaviy test o‘tkazish bo‘yicha qaror qabul qilgan. Aeroportning kirish va chiqish eshiklari yopilgan, barcha reyslar bekor qilingan. Shundan so‘ng aholi o‘rtasida vahima yuzaga kelgan: e’lon qilingan kadrlardan ko‘rish mumkinki, yuzlab fuqarolar himoya kostyumlaridagi tibbiyot xodimlariga qarshilik ko‘rsatib chiqish eshigi tomon yugurgan.

Pudun aeroporti 14 kunga, ya’ni 7-dekabrga qadar yopilgan. So‘nggi ma’lumotlarga ko‘ra, aeroportdagi yana yetti kishining koronavirusga topshirgan testi ijobiy chiqqan.

“Xodimlar va tashrif buyuruvchilar uylariga qayta olmayapti. Odamlar aylanma yo‘llar orqali chiqib ketishga urinmoqda”, — deyiladi xabarda.

Shanxay sog‘liqni saqlash komissiyasi ma’lumotlariga ko‘ra, aeroportdagi bemorda virusning Shimoliy Amerika shtammi aniqlangan. Aeroport qachondan boshlab odatdagi faoliyatiga qaytishi noma’lum. 22-noyabr kunining o‘zida jami 627 ta reys bekor qilingan.

Telegram’dagi “Xitoy xavfi” kanalida yozilishicha, Shanxaydagi Pudun xalqaro aeroportining terminallari koronavirus bilan bog‘liq holat qayd etilganiga qaramay, odatdagi rejimda ishlashni davom ettirmoqda. Barcha ichki va xalqaro reyslar o‘zining avvalgi jadvaliga ko‘ra amalga oshirilmoqda.

Eslatib o‘tamiz, Xitoy markazidagi Xubey viloyatida joylashgan, 11 million aholi istiqomat qiladigan Uxan shahrida hayvon va dengiz mahsulotlari bozoriga aloqador odamlarning 2019-yilning dekabr oyi o‘rtalaridan boshlab kelib chiqishi noma’lum pnevmoniya bilan kasallanish holatlari aniqlangan edi. Keyinchalik xitoylik olimlar bu kasallik yangi — 2019-nCoV koronavirusi bilan bog‘liq ekanligini aniqlagan.

Shundan so‘ng, 22-yanvar kuni Uxan shahrida karantin joriy etildi, jamoat transporti harakati to‘xtatildi, shaharga kirish va chiqish to‘xtatildi.