Yevropa kasalliklar profilaktikasi va nazorati markazi (ECDC) so‘nggi 14 kun ichida Yevroittifoqdagi kasallanish holatlari bo‘yicha hisobot e’lon qildi, deb yozadi “Kommersant”. Chexiya, Belgiya va Bolgariya har 100 ming kishiga o‘lim holati bo‘yicha yetakchiga aylandi.
“Chexiya so‘nggi haftalar ichida Yevroittifoq mamlakatlari orasida COVID-19’ga chalinganlar soni bo‘yicha birinchilikdan tushdi. Biroq respublika, ECDC ma’lumotlariga qaraganda, har 100 ming kishiga koronavirusdan o‘lim holatining hissasi bo‘yicha so‘nggi 14 kun yakunlariga ko‘ra, Yevroittifoqda yetakchi bo‘lib qolmoqda”, — deyiladi Chexiya SSV xabarida.
Har 100 ming aholiga o‘lim holatlari soni bo‘yicha so‘nggi 14 kunda yetakchi bo‘lgan Yevroittifoq mamlakatlari quyidagilar:
- Chexiya — 23,4;
- Belgiya — 22,1;
- Bolgariya — 17,2;
- Polsha — 14,3;
- Sloveniya — 14.
Avvalroq mamlakatlar infeksiyaga qarshi kurash uchun zarur infratuzilmani yaratmasa, Yevropada koronavirus tarqalishining uchinchi to‘lqini ko‘tarilishi mumkinligi haqida Jahon sog‘liqni saqlash tashkilotining COVID-19 bo‘yicha maxsus elchisi Devid Nabarro aytib o‘tgan edi.
JSST ma’lumotlariga ko‘ra, Yevropada kasallanish holatlari boshqa mintaqalarga nisbatan ko‘proq qayd etilmoqda. Chunonchi, o‘tgan hafta koronavirusga chalinish holatlarining 46 foizi va o‘lim holatlarining 49 foizi Yevropa mamlakatlari hissasiga to‘g‘ri kelgan. Shu bilan birga, mintaqada kasallanish darajasi bir hafta ichida 10 foizga pasaydi, bunga karantin choralari sabab bo‘ldi.
Eslatib o‘tamiz, Seul, Inchxon va Kyongido shaharlari joylashgan Seulning poytaxt mintaqasida koronavirus infeksiyasining uchinchi to‘lqini boshlangani xabar berildi. Mamlakatda bir necha kundan buyon bir kecha-kunduzda 300 dan ortiq kasallanish holatlari qayd etilmoqda. Shu munosabat bilan, Seulda COVID-19’ga qarshi choralar kuchaytiriladi.
Izoh (0)