Tan olinmagan Tog‘li Qorabog‘ning hududi va unga yondosh barcha tumanlar “xalqaro huquq nuqtayi nazaridan” Ozarbayjonga tegishli, chunki Armaniston ushbu hududlarning mustaqilligini tan olmagan. Bu kabi fikrni Rossiya prezidenti Vladimir Putin “Moskva. Kreml. Putin” dasturining efiri davomida bildirib o‘tdi, deb xabar beradi “RBK”.
“Axir Armaniston Tog‘li Qorabog‘ning mustaqilligi va suverenitetini tan olmagan. Bu esa xalqaro huquq nuqtayi nazaridan Tog‘li Qorabog‘ va uning atrofidagi barcha tumanlar Ozarbayjonning ajralmas qismi ekanligini bildirgan va bildiradi”, — deydi Rossiya prezidenti.
Biroq Putinning ta’kidlashicha, hududning yakuniy maqomi hali belgilanmagan. “Biz kvo-maqomini (urushdan oldingi holati — tahr.) saqlab qolishga kelishib oldik. Keyinchalik nima bo‘lishi endi hal etiladi yoki ushbu jarayonning kelajakdagi ishtirokchilari, rahbarlari hal etishi kerak”, — deya qo‘shimcha qiladi Putin.
Putinning so‘zlariga ko‘ra, Kollektiv xavfsizlik to‘g‘risidagi shartnoma tashkilotiga a’zolik shartida Rossiyaning ushbu mojaroga aralashishi ko‘zda tutilmagan. Shartnomada ushbu shartnomaga a’zo-davlatga tajovuz qilinganida o‘zaro yordam ko‘rsatish belgilangan. Putinning ta’kidlashicha, Armaniston hududida hech kim hujum uyushtirmagan, shu sababli Rossiyaning jangovar harakatlarda ishtirok etishiga hech qanday huquq berilmagan.
Shu bilan birga, Putinning aytishicha, Moskva Yerevan bilan harbiy-texnik hamkorlik doirasidagi barcha majburiyatlarini to‘liq bajargan.
Eslatib o‘tamiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Shundan so‘ng Armanistonda ushbu bitim sabab norozilik namoyishlari boshlandi va u ikki haftadan buyon davom etmoqda. Bitimga ko‘ra, Ozarbayjon mintaqa hududining katta qismini olgan. Muxolifat Pashinyan “xoinlik” shartnoma imzolangani sababli iste’foga chiqishini talab qilmoqda.
Izoh (0)