Bruklindagi muzlatkich-morglarda AQShda koronavirusning birinchi to‘lqini vaqtida halok bo‘lgan 650 nafarga yaqin odamning jasadlari bahordan beri saqlanmoqda. Bu haqda Nyu-York bosh sud-tibbiyot ekspertiga tayanib, The Wall Street Journal xabar berdi.
Koronavirus qurbonlarining jasadi ularning qarindoshlari topilmagani yoki ular dafn marosimi pullarini to‘lay olmagani sabab ko‘chma morglarda qolmoqda. Bosh sud-tibbiyot eksperti ofisining ma’lum qilishicha, vafot etgan 230 kishining qarindoshlarini topishni imkoni bo‘lmagan. Ularga oid ma’lumotlar eskirgan yoki noto‘g‘ri bo‘lishi mumkin. Ayrim holatlarda esa qarindoshlar moliyaviy sabablarga ko‘ra, marhumlarning jasadini olib kelmagan.
Jons Hopkins universiteti ma’lumotlariga ko‘ra, AQShda koronavirusga chalinganlarning umumiy soni 12,2 milliondan oshgan bo‘lib, ularning 256 mingdan ortig‘i virus qurboniga aylangan.
Eslatib o‘tamiz, aprel oyida Nyu-Yorkning Bruklin tumanidagi dafn byurosi yaqinida ichida o‘nlab chiriyotgan jasad bo‘lgan yuk mashinasi topilgan edi.
Izoh (0)