AstraZeneca kompaniyasi Oksford universiteti bilan hamkorlikda yaratilayotgan koronavirusga qarshi AZD1222 vaksinasining samaradorligi 70 foizga tengligini ma’lum qildi.
Ta’kidlanishicha, AstraZeneca kompaniyasi o‘zi tomonidan yaratilgan vaksinadan foydalanishga ruxsat berilsa, 2021-yilda 3 milliard doza vaksina ishlab chiqarishga tayyor.
Vaksina samaradorligiga oid press-relizda qayd etilishicha, AstraZeneca tomonidan yaratilgan vaksinani Selsiy bo‘yicha 2-8 darajada saqlash va uni yetkazib berish mumkin, vaksinatsiya jarayoni esa alohida sharoitlarni talab qilmaydi.
Avvalroq AQShning Pfizer kompaniyasi Germaniyaning BioNTech kompaniyasi bilan birgalikda ishlab chiqarilgan COVID-19’ga qarshi vaksinaning samaradorligi 95 foizni tashkil etishini ma’lum qilgandi. Kompaniya ma’lumotlariga ko‘ra, vaksina sinovda qatnashayotgan kishining yoshi, irqi va millatidan qat’i nazar, samarali bo‘lgan. Dastlabki sinov natijalari 90 foiz samaradorlikni ko‘rsatgan.
Shuningdek, noyabr oyida Amerikaning Moderna kompaniyasi o‘zining yangi koronavirusga qarshi vaksinasi sinovlarning uchinchi bosqichida 94,5 foiz samaradorlik ko‘rsatgani haqida xabar berdi. Rossiyaning “Sputnik V” vaksinasini ishlab chiqaruvchilar esa o‘zlarining vaksinasi samaradorligini 92 foizga baholadi.
Mavzuga doir:
- Bill Geyts koronavirusga qarshi dastlabki vaksinalar samaradorligi ideal bo‘lmasligi mumkinligini aytdi
- Hindistonda COVID-19’ga qarshi vaksina sinovining yakuniy bosqichi boshlandi
- Pfizer o‘zining COVID-19’ga qarshi vaksinasini AQShda soddalashtirilgan tartibda ro‘yxatdan o‘tkazish uchun ariza berdi
Izoh (0)