Шанхайнинг Пудун аэропорти ходимида коронавирус аниқлангани сабаб тартибсизлик юзага келди. Одамлар изоляцияга тушиб қолмаслик учун аэропорт биносидан чиқиб кетишга уринган, деб ёзади Telegram’даги Мash канали.
Маълумотларга кўра, аэропорт ходимларидан бирида коронавирус аниқлангани сабаб раҳбарият оммавий тест ўтказиш бўйича қарор қабул қилган. Аэропортнинг кириш ва чиқиш эшиклари ёпилган, барча рейслар бекор қилинган. Шундан сўнг аҳоли ўртасида ваҳима юзага келган: эълон қилинган кадрлардан кўриш мумкинки, юзлаб фуқаролар ҳимоя костюмларидаги тиббиёт ходимларига қаршилик кўрсатиб чиқиш эшиги томон югурган.
Пудун аэропорти 14 кунга, яъни 7 декабрга қадар ёпилган. Сўнгги маълумотларга кўра, аэропортдаги яна етти кишининг коронавирусга топширган тести ижобий чиққан.
«Ходимлар ва ташриф буюрувчилар уйларига қайта олмаяпти. Одамлар айланма йўллар орқали чиқиб кетишга уринмоқда», — дейилади хабарда.
Шанхай соғлиқни сақлаш комиссияси маълумотларига кўра, аэропортдаги беморда вируснинг Шимолий Америка штамми аниқланган. Аэропорт қачондан бошлаб одатдаги фаолиятига қайтиши номаълум. 22 ноябрь кунининг ўзида жами 627 та рейс бекор қилинган.
Telegram’даги «Хитой хавфи» каналида ёзилишича, Шанхайдаги Пудун халқаро аэропортининг терминаллари коронавирус билан боғлиқ ҳолат қайд этилганига қарамай, одатдаги режимда ишлашни давом эттирмоқда. Барча ички ва халқаро рейслар ўзининг аввалги жадвалига кўра амалга оширилмоқда.
Эслатиб ўтамиз, Хитой марказидаги Хубэй вилоятида жойлашган, 11 миллион аҳоли истиқомат қиладиган Ухань шаҳрида ҳайвон ва денгиз маҳсулотлари бозорига алоқадор одамларнинг 2019 йилнинг декабрь ойи ўрталаридан бошлаб келиб чиқиши номаълум пневмония билан касалланиш ҳолатлари аниқланган эди. Кейинчалик хитойлик олимлар бу касаллик янги — 2019-nCoV коронавируси билан боғлиқ эканлигини аниқлаган.
Шундан сўнг, 22 январь куни Ухань шаҳрида карантин жорий этилди, жамоат транспорти ҳаракати тўхтатилди, шаҳарга кириш ва чиқиш тўхтатилди.
Изоҳ (0)