JSST Yevropada koronavirusning uchinchi to‘lqini boshlanishi mumkinligi haqida ogohlantirdi

Mamlakatlar infeksiyaga qarshi kurash uchun zarur infratuzilmani yaratmasa, Yevropada koronavirus tarqalishining uchinchi to‘lqini ko‘tarilishi mumkin. Bu haqda Jahon sog‘liqni saqlash tashkilotining COVID-19 bo‘yicha maxsus elchisi Devid Nabarro Solothurner Zeitung nashriga bergan intervyusida aytib o‘tdi, deb yozadi “RBK”.

“Yevropaning pandemiyaga nisbatan javob choralari yetarli bo‘lmadi. Ular birinchi to‘lqinni nazorat ostiga olganidan keyin, yoz oylarida zarur infratuzilmani qura olmadi. Hozir esa bizda ikkinchi to‘lqin. Agar ular hozir infratuzilmani qurmasa, kelasi yil boshida ular uchinchi to‘lqinga duch keladi”, — deya ogohlantirdi Nabarro.

Uning ta’kidlashicha, aytib o‘tilgan strategiyadan boshqa muqobil vosita yo‘qligini uning JSSTdagi hamkasblari doimiy ravishda takrorlashga majbur bo‘lmoqda. Nabarroning so‘zlariga ko‘ra, har bir mamlakatda mahalliy darajada kasallangan odamlarni aniqlash jarayonini tashkillashtirish, shuningdek, yuqtirganlar zanjirini uzib, virusning mahalliy avj olishlarini tiyish zarur.

“Ko‘plab G‘arbiy Yevropa mamlakatlarining vazifasi — izolyatsiyani joriy qilmasdan turib, virusni yana nazorat ostiga olish. Chunki bu favqulodda qo‘pol vosita. Bu sizga juda qimmatga tushadi”, — deya aniqlik kiritdi JSST maxsus elchisi.

JSST ma’lumotlariga ko‘ra, Yevropada kasallanish holatlari boshqa mintaqalarga nisbatan ko‘proq qayd etilmoqda. Chunonchi, o‘tgan hafta koronavirusga chalinish holatlarining 46 foizi va o‘lim holatlarining 49 foizi Yevropa mamlakatlari hissasiga to‘g‘ri kelgan. Shu bilan birga, mintaqada kasallanish darajasi bir hafta ichida 10 foizga pasaydi, bunga karantin choralari sabab bo‘ldi.

Nabarro Osiyodagi koronavirusga qarshi kurashish choralarini namuna qilib ko‘rsatdi. U yerda odamlar ehtiyot choralariga, shu jumladan, niqob taqish va masofa saqlashga rioya qilmoqda. Uning aniqlik kiritishicha, u yerda hukumat va fuqarolar o‘rtasida to‘g‘ri dialog yo‘lga qo‘yilgan, bundan tashqari, salomatlik va iqtisodiyotdan birini tanlashga to‘g‘ri kelmaydi. “Osiyo mamlakatlarida har doim iqtisodiyotni yo‘lga qo‘yish uchun yaxshi salomatlik kerakligini aytishadi. ‘yoki u, yoki bu’ degan narsa yo‘q, faqat ‘u ham, bu ham’ degan narsa bor”, — dedi Nabarro.

Bundan tashqari, Sharqiy Osiyo strategiyasiga kasallanish holatlari kamayganda ham, qat’iy choralarni saqlab qolish xosdir. Hukumat choralarni susaytirishga shoshmaydi va kasallanish holatlari barqaror tarzda pasayishini kutadi, dedi ekspert.

Eslatib o‘tamiz, Seul, Inchxon va Kyongido shaharlari joylashgan Seulning poytaxt mintaqasida koronavirus infeksiyasining uchinchi to‘lqini boshlangani xabar berildi. Mamlakatda bir necha kundan buyon bir kecha-kunduzda 300 dan ortiq kasallanish holatlari qayd etilmoqda.