ЖССТ Европада коронавируснинг учинчи тўлқини бошланиши мумкинлиги ҳақида огоҳлантирди

Мамлакатлар инфекцияга қарши кураш учун зарур инфратузилмани яратмаса, Европада коронавирус тарқалишининг учинчи тўлқини кўтарилиши мумкин. Бу ҳақда Жаҳон соғлиқни сақлаш ташкилотининг COVID-19 бўйича махсус элчиси Дэвид Набарро Solothurner Zeitung нашрига берган интервьюсида айтиб ўтди, деб ёзади «РБК».

«Европанинг пандемияга нисбатан жавоб чоралари етарли бўлмади. Улар биринчи тўлқинни назорат остига олганидан кейин, ёз ойларида зарур инфратузилмани қура олмади. Ҳозир эса бизда иккинчи тўлқин. Агар улар ҳозир инфратузилмани қурмаса, келаси йил бошида улар учинчи тўлқинга дуч келади», — дея огоҳлантирди Набарро.

Унинг таъкидлашича, айтиб ўтилган стратегиядан бошқа муқобил восита йўқлигини унинг ЖССТдаги ҳамкасблари доимий равишда такрорлашга мажбур бўлмоқда. Набарронинг сўзларига кўра, ҳар бир мамлакатда маҳаллий даражада касалланган одамларни аниқлаш жараёнини ташкиллаштириш, шунингдек, юқтирганлар занжирини узиб, вируснинг маҳаллий авж олишларини тийиш зарур.

«Кўплаб Ғарбий Европа мамлакатларининг вазифаси — изоляцияни жорий қилмасдан туриб, вирусни яна назорат остига олиш. Чунки бу фавқулодда қўпол восита. Бу сизга жуда қимматга тушади», — дея аниқлик киритди ЖССТ махсус элчиси.

ЖССТ маълумотларига кўра, Европада касалланиш ҳолатлари бошқа минтақаларга нисбатан кўпроқ қайд этилмоқда. Чунончи, ўтган ҳафта коронавирусга чалиниш ҳолатларининг 46 фоизи ва ўлим ҳолатларининг 49 фоизи Европа мамлакатлари ҳиссасига тўғри келган. Шу билан бирга, минтақада касалланиш даражаси бир ҳафта ичида 10 фоизга пасайди, бунга карантин чоралари сабаб бўлди.

Набарро Осиёдаги коронавирусга қарши курашиш чораларини намуна қилиб кўрсатди. У ерда одамлар эҳтиёт чораларига, шу жумладан, ниқоб тақиш ва масофа сақлашга риоя қилмоқда. Унинг аниқлик киритишича, у ерда ҳукумат ва фуқаролар ўртасида тўғри диалог йўлга қўйилган, бундан ташқари, саломатлик ва иқтисодиётдан бирини танлашга тўғри келмайди. «Осиё мамлакатларида ҳар доим иқтисодиётни йўлга қўйиш учун яхши саломатлик кераклигини айтишади. ‘ёки у, ёки бу’ деган нарса йўқ, фақат ‘у ҳам, бу ҳам’ деган нарса бор», — деди Набарро.

Бундан ташқари, Шарқий Осиё стратегиясига касалланиш ҳолатлари камайганда ҳам, қатъий чораларни сақлаб қолиш хосдир. Ҳукумат чораларни сусайтиришга шошмайди ва касалланиш ҳолатлари барқарор тарзда пасайишини кутади, деди эксперт.

Эслатиб ўтамиз, Сеул, Инчхон ва Кёнгидо шаҳарлари жойлашган Сеулнинг пойтахт минтақасида коронавирус инфекциясининг учинчи тўлқини бошлангани хабар берилди. Мамлакатда бир неча кундан буён бир кеча-кундузда 300 дан ортиқ касалланиш ҳолатлари қайд этилмоқда.