Yevropa Ittifoqi 19-noyabrda AQShda prezidentlik saylovlaridan keyin hukumat almashayotgan bir pallada o‘lim jazosi ijro etilganidan xavotirda ekanini bildirdi. Yevroittifoq hukumati AQSh administratsiyasidan qatllarni to‘xtatishni so‘radi.
“Yevroittifoq o‘lim jazosining ijro etilishiga qarshi ekanini eslatib o‘tadi va AQSh administratsiyasidan ushbu qarorni har qanday sharoitda istalgan vaqtda qayta ko‘rib chiqish va federal darajadagi qatllarni to‘xtatishni talab qiladi”, — deyilgan ittifoq bayonotida.
Yevroittifoq tashqi siyosiy xizmatining qayd etishicha, Yevropa Ittifoqi o‘lim jazosini g‘ayriinsoniy va shafqatsiz deb hisoblaydi, u jinoyatlarni kamaytirish yoki to‘xtatish omili bo‘lib xizmat qila olmaydi. Bayonotda, shuningdek, sudning qarori xato chiqarilsa, jazo ijro etilgach uni to‘g‘rilashning imkoni bo‘lmasligi bildirilgan.
AQSh 2019-yil yozidan boshlab federal darajada o‘lim jazosini ijro etishga qaytgan. Bungacha federal qatllar so‘nggi bor 2003-yilda amalga oshirilgan. Shunga qaramay, mamlakatning ayrim shtatlarida qatl hukmiga hanuzgacha ruxsat beriladi.
Moratoriydan keyingi birinchi o‘lim hukmi 2020-yil 13-iyulida amalga oshirilgan. Shu kuni 1996-yilda uch kishidan iborat oilani o‘ldirgan 47 yoshli Daniel Lyuis Li qatl qilingan. Shundan keyin AQShda federal darajada yana 8 nafar jinoyatchiga o‘lim hukmi ijro etildi.
2019-yilgi ma’lumotlarga ko‘ra, AQShda 2600 dan ortiq mahbus o‘lim jazosiga hukm qilingan. Federal doirada esa 62 kishiga shunday jazo turi tayinlangan.
Death Penalty Information Center ma’lumotlariga ko‘ra, 2019-yilda mamlakatda 22 nafar mahkum qatl qilingan. O‘lim jazosi Alabama, Jorjiya, Tennessi, Florida, Missuri, Janubiy Dakota shtatlarida ijro etilgan. Deyarli barcha mahkumlar tanaga inyeksiya yuborish yo‘li bilan o‘ldirilgan.
Avgust oyida AQSh federal hukumati ilk bor hindu millatiga mansub shaxsni qatl etgan, oktabrda esa federal hukumat 67 yil ichida birinchi marta ayol kishini qatl qilishi haqida xabar berilgan.
Izoh (0)