Niderlandiyalik jurnalist Yevroittifoq mudofaa vazirlarining yopiq videoanjumaniga kirib qoldi. Hammasi Twitter’dagi postdan boshlangan

Niderlandiyaning RTL Nieuws teledasturi jurnalisti Daniel Verlaan Yevroittifoq mamlakatlarining mudofaa vazirlarining yopiq tarzda o‘tayotgan videokonferensiyasi ishtirokchisiga aylandi. Bu haqda Meduza xabar bergan.

Verlaan xakerlarga o‘xshab atayin videokonferensiyaga kirishga urinmagan. Shunchaki Twitter’da Niderlandiya mudofaa vaziri Anki Beyleveld tomonidan e’lon qilgan fotosuratdagi oltita raqamni, ya’ni konferensiyada ishtirok etish kodini terishga ulgurgan. Foto ijtimoiy tarmoqdan juda tez o‘chirib tashlangan, ammo RTL Nieuws teledasturi ushbu kod haqida axborot olishga ulgurgan. Jurnalist raqamlarni tanlash yo‘li bilan yetishmagan belgini aniqlagan va ortiqcha qiyinchiliklarsiz videokonferensiyaga qo‘shilishni uddalagan.

Verlaan ekranda ko‘ringach, Yevroittifoqning tashqi siyosat va xavfsizlik masalalari bo‘yicha oliy vakili Jozep Borrel unga savol bilan murojaat qilib, maxfiy konferensiya ishtirokchisiga aylanganini bilish yoki bilmasligi haqida so‘ragan. Verlaan niderlandiyalik jurnalist ekanini aytib, zudlik bilan ushbu onlayn anjumandan chiqib ketishini bildirgan. Garchi jurnalist va’dasida turib, zudlik bilan videokonferensiyadan chiqib ketgan bo‘lsa ham, tadbir ushbu voqeadan keyin juda tez, belgilangan muddatdan avval yakuniga yetgan.

https://twitter.com/i/status/1329885925862760450

Yevropa ittifoqining tashqi siyosiy masalalar bo‘yicha komissariyati sodir bo‘lgan voqeaga munosabat bildirib, yopiq videokonferensiyada bunday paydo bo‘lish noqonuniy ekani va bu haqda vakolatli organlarga axborot berilishini ma’lum qilgan. Shuningdek, komissariyat bayonotida jurnalist videoanjumanga kirib qolgan vaqtida vazirlar hech qanday maxfiy mavzuni muhokama qilmagani qayd etilgan.

Niderlandiya bosh vaziri Mark Ryutte mudofaa vazirlarining yig‘ilishlarida “hech kimni hafa qilmaydigan” mazmundagi masalalar muhokama qilinmasligini aytib o‘tgan.

“Boshqa vazirlar ham Beyleveld xatosi misolida bu kabi masalalarda ehtiyotkor bo‘lish zarurligini tushunib yetadi degan umiddaman”, — degan u.

Niderlandiya mudofaa vaziri esa konferensiyaga kirish kodi aks etgan surat vazirlik xodimlaridan birining “ahmoqona xato”si ekanini ta’kidlagan.