Seul, Inchxon va Kyongido shaharlari joylashgan Seulning poytaxt mintaqasida koronavirus infeksiyasining uchinchi to‘lqini boshlandi. Bu haqda mamlakat Sog‘liqni saqlash va ijtimoiy ta’minot vazirligi vakili Yun Txe Xo ma’lum qildi, deb yozadi “RBK”.
“Bizning fikrimizcha, poytaxt mintaqasida ayni paytda infeksiya tarqalishining uchinchi to‘lqini ko‘tarilmoqda. Bundan avval kasallanishning bunday avj nuqtalari fevral–martda va avgustda kuzatilgan edi”, — deya aniqlik kiritdi u.
Shu munosabat bilan mamlakat bosh vaziri Chon Se Gyun fuqarolardan ommaviy tadbirlar o‘tkazishdan, shu jumladan, ochiq havodagi tadbirlardan ham tiyilishni so‘radi.
The Korea Herald ma’lumotlariga ko‘ra, mamlakatda bir necha kundan buyon bir kecha-kunduzda 300 dan ortiq kasallanish holatlari qayd etilmoqda.
SSV ma’lumotlariga ko‘ra, o‘tgan sutkada respublikada 363 kishi kasallikka chalingan, Seulda 127 kishi virusni yuqtirgan. Pandemiya boshidan buyon Janubiy Koreyada jami 30 mingdan ziyod odam koronavirusga chalingan.
Kasallanish darajasini pasaytirish uchun hukumat cheklov choralarini joriy qildi. Poytaxt mintaqasida fuqarolar 1,5 metrlik masofaga rioya qilishi kerak. Festivallar kabi 100 dan ortiq odam ishtirokidagi ommaviy tadbirlar taqiqlangan. Ishtirokchilari soni 500 kishidan boshlanadigan yig‘ilishlar uchun hukumatdan ruxsat olish va ijtimoiy masofani ta’minlash zarur bo‘ladi.
Avvalroq Janubiy Koreyada 13-noyabrdan boshlab jamoat joylari va transportda niqobsiz yurgan kishilar jarima to‘lashi xabar berilgan edi.
Izoh (0)