Xitoy Xalq Respublikasi raisi Si Szinpin “Katta yigirmalik” (G20) virtual sammitida nutq so‘zlab, “salomatlik kodlari”ni o‘zaro tan olish bo‘yicha xalqaro mexanizm yaratishni taklif qildi, deb yozadi Meduza.

Foto: AP Photo

Si Szinpinning ingliz tiliga tarjima qilinib, “Sinxua” agentligi tomonidan e’lon qilingan nutqi matnida gap “koronavirusning nuklein kislotasiga nisbatan testlar natijalariga asoslangan, xalqaro tan olinadigan QR-kodlar ko‘rinishidagi markirovka” haqida bormoqda.

Si Szinpin ushbu mexanizmga nafaqat G20 ishtirokchilari, balki boshqa ko‘plab mamlakatlar ham qo‘shilishiga umid bildirdi.

“Salomatlik kodlari” xalqaro mexanizmi haqidagi boshqa tafsilotlarga Si Szinpin to‘xtalmadi.

Xitoyda 2020-yil bahoridan buyon “salomatlik kodlari” tizimi amal qiladi. Mamlakatdagi har bir odamga koronavirusga topshirgan testi, epidemik holat qay darajada bo‘lgan mintaqada ekanligi, COVID-19’ga chalinganlar bilan muloqotda bo‘lgani va boshqa ma’lumotlar asosida “qizil”, “sariq” yoki “yashil” QR-kod beriladi. Ko‘pchilik joylarga faqat “yashil” QR-kod talab qilinadi.

Dastlab bunday kodlar tizimi alohida hududlarda amal qilgan bo‘lsa, may oyidan buyon butun Xitoy hududiga tarqaldi.

Si Szinpin, shuningdek, COVID-19’ga qarshi vaksina dunyoning barcha xalqlariga yetib borishi uchun bor imkoniyatini ishga solishini aytdi. Koronavirusga qarshi vaksina bilan barcha mamlakatlarni ta’minlash zaruriyati haqida G20 sammitida qatnashgan Rossiya prezidenti Vladimir Putin ham ta’kidlab o‘tdi. “Bizning olimlarimiz tomonidan ishlab chiqilgan vaksinalarni ehtiyojmand mamlakatlarga yetkazish”ga Rossiya tayyor, — dedi Putin.

Umuman, “Katta yigirmalik” (G20) mamlakatlari yetakchilari koronavirusga qarshi vaksinalar, zarur dori vositalari va testlar butun dunyo bo‘ylab odilona taqsimlanishini ta’minlashga, shuningdek, nochor mamlakatlarni pandemiya bilan kurashda qo‘llab-quvvatlashga va’da berdi. Bu haqda “yigirmalik” kommyunikesi loyihasida aytiladi.

G20 yetakchilari pandemiya boylar va kambag‘allar o‘rtasidagi farqlarni yanada kuchaytirishidan xavotirda. “Badavlatroq odamlargina o‘zini virusdan himoya qila oladigan vaziyatga nima qilib bo‘lsa ham, tushmasligimiz kerak”, — dedi Fransiya prezidenti Emmanuel Makron onlayn sammitda.

Buning uchun Yevroittifoq G20’ni Jahon sog‘liqni saqlash tashkilotining “COVID-19’ga qarshi vositalardan foydalanish imkoniyatini tezlashtirish” loyihasiga investitsiya kiritishga chaqirdi, u kasallikni tashxislash va davolash texnologiyalarini ishlab chiqishni tezlashtirishga qaratilgan. Yevrokomissiya rahbari Ursula fon der Lyayen fikricha, yil oxirigacha tashabbusga 4,5 milliard dollar kiritish kerak.

Hozirda Rossiya, AQSh, Xitoy, Fransiya, Buyuk Britaniya va boshqa mamlakatlar o‘z vaksinalarini ishlab chiqmoqda.

Noyabr oyining boshida Pfizer va BioNTech o‘zlarining BNT162b2 vaksinasi uchinchi bosqich sinovlarida 90 foiz samara ko‘rsatganini e’lon qildi. Bir hafta o‘tgach kompaniyalar vaksinaning samaradorligi 95 foiz ekanligini ma’lum qildi. Amerika fond birjalari Pfizer/BioNTech vaksinasining samaradorligi to‘g‘risidagi xabarlarga indekslarning rekord darajada o‘sishi bilan munosabat bildirdi, masalan, aviakompaniyalarning qimmatli qog‘ozlari qimmatlashdi, Zoom aksiyalari esa aksincha, pasayib ketdi.

Shuningdek, noyabr oyida Amerikaning Moderna kompaniyasi o‘zining yangi koronavirusga qarshi vaksinasi sinovlarning uchinchi bosqichida 94,5 foiz samaradorlik ko‘rsatgani haqida xabar berdi. Rossiyaning “Sputnik V” vaksinasini ishlab chiqaruvchilar esa o‘zlarining vaksinasi samaradorligini 92 foizga baholadi.