O‘zbekiston maktabgacha ta’lim vaziri o‘rinbosari Maqsud Yo‘ldoshev 18-noyabr kuni Qonunchilik palatasi majlisida ro‘y bergan holatga izoh berdi.
Vazir o‘rinbosari “Kun.uz” nashriga bergan intervyusida deputatlarga bergan hisobotida yolg‘on yo‘qligi, barcha so‘zlarini asoslab bera olishini aytdi, ammo o‘sha vaqtda telefonda tanishi bilan nima mavzuda gaplashganini va “Obqochishga majburmiz endi, nima qilamiz?”, deganda nimani nazarda tutganini ayta olmadi.
Maqsud Yo‘ldoshevning ma’lum qilishicha, u 18-noyabr kuni bir vaqtning o‘zida ikkita videokonferensiyada qatnashgan. “Shogirdimiz ilmiy ishini himoya qilayotgandi. Bizda ilmiy kengash bor doktorlik ishlari bo‘yicha. Bitta kompyuterda ilmiy kengashning yig‘ilishiga ulangan bo‘lsam, ikkinchisida parlament majlisini kuzatib bordim”, — deya ta’kidlagan vazir o‘rinbosari.
“Qonunchilik palatasi majlisida deputatning savoliga javob bergandan so‘ng kamerani o‘chiribman-da, mikrofonni o‘chirish yodimdan chiqibdi.
Shu payt tanishimdan qo‘ng‘iroq bo‘lib qoldi. Mikrofon yoniq bo‘lgani uchun to‘g‘ridan to‘g‘ri efirda ushbu muloqotimizning bir qismi eshitilgan. Telefondagi so‘zlashuv shaxsiy muloqot bo‘lib, buning deputatlar savoliga bergan javoblarimga hech qanday aloqasi yo‘q”, — deya holatga izoh bergan Maqsud Yo‘ldoshev.
“Deputatlarga bergan har bir javobim asosli, bu tizimda bo‘layotgan narsa. Masalan, oktabr—noyabr oylarida 1700 ta bitim imzolandi, deganlarim, davlat xususiy sherikchilikka yo‘naltirilgan mablag‘lar, bular hammasi amaliyotda bo‘lib kelayotgan narsalar. Telefondagi suhbat paytida aytilgan gapimizga bularning umuman aloqasi yo‘q. Agar kimdadir bunga shubha bo‘ladigan bo‘lsa, deputatlarga bergan javobimda aytgan ma’lumotlarimning barchasini asoslab, isbotlab bera olaman”, — deb qo‘shimcha qilgan vazirlik mas’uli.
Maqsud Yo‘ldoshevning so‘zlariga ko‘ra, unga telefon qilgan Xurshid ismli kishi uning do‘sti, o‘zi tengi o‘rtog‘i. “O‘rtamizda telefon orqali kechgan muloqot o‘ta shaxsiy masala bo‘lgani uchun nima masalani gaplashganimizni ochiqlay olmayman”, — deya izoh bergan vazir o‘rinbosari.
Eslatib o‘tamiz, Oliy Majlis Qonunchilik palatasining 18-noyabr kuni o‘tkazilgan navbatdagi majlisida davlat-xususiy sherikchiligi to‘g‘risidagi savollarga javob qaytargan maktabgacha ta’lim vaziri o‘rinbosari Maqsud Yo‘ldoshev o‘chirishni unutib, “Obqochishga majburmiz endi, nima qilamiz?”, degan so‘zlari to‘g‘ridan to‘g‘ri efirga ketgandi. Majlis Youtube orqali jonli efirga uzatilayotgan bo‘lgan. Maqsud Yo‘ldoshev o‘sha paytda qo‘ng‘iroq qilgan Xurshid ismli shaxsga javob bergan va uning “Obqochishga majburmiz endi, nima qilamiz?”, degan so‘zlari deputatlarning savollariga bergan javoblariga nisbatan aytilgani taxmin qilingandi.
Shundan keyin holat yuzasidan Maktabgacha ta’lim vazirligi matbuot kotibi Mavluda Asqarxo‘jayeva izoh berdi. Uning ma’lum qilishicha, haqiqatan ham Maqsud Yo‘ldoshev deputatlar savollariga javob bergandan so‘ng onlayn uzatilayotgan efir mikrofonini o‘chirishni esidan chiqarib, ish faoliyatini davom ettirgan hamda bu jarayonda unga bo‘lgan qo‘ng‘iroqqa javob bergan.
“Vazir o‘rinbosari Maqsud Yo‘ldoshev bu telefon orqali so‘zlashuv mazmuni deputatlarga berilgan javobga aloqasi yo‘qligini ma’lum qildi. Shu munosabat bilan, ommaviy axborot vositalari vakillaridan turli xil ‘ehtimollar’ga asoslangan fikrlarini ilgari surmasliklari va vaziyatga to‘g‘ri baho berishlarini so‘raymiz”, — deyiladi vazirlik matbuot kotibi axborotida.
Oliy Majlis Qonunchilik palatasi deputati Rasul Kusherbayev vazir o‘rinbosarining bu xatti-harakatiga shunday munosabat bildirgan: “Maktabgacha ta’lim vaziri o‘rinbosari o‘zi bilmagan holda ish tizimi bo‘yicha bor haqiqatni ochib qo‘ydi: tizim olib qochishga moslashgan. Bugun deputatlarni aldab olib qoching, ertaga Prezidentni aldab olib qoching, keyin xalqni aldab olib qoching”.
Izoh (0)