Korporativ axborot yagona portalidagi ma’lumotlariga ko‘ra yagona ta’sischisi Jahongir Ortiqxo‘jayev bo‘lgan J-United Group kompaniyasi “Poytaxt bank”dan 20 milliard so‘m kredit olgani xabar berilgan edi. “Poytaxt bank” bu xabarni rad etdi.
“J-United Group MChJ bugunga qadar ‘Poyxat bank’ AJda hisob raqam ochmagan va ushbu tashkilot mijozi hisoblanmaydi. Rasman ma’lum qilamizki, ‘Poyxat bank’ tomonidan J-United Group MChJga kredit ajratilgani haqidagi ma’lumot haqiqatga muvofiq emas”, — deyiladi Telegram’dagi “davletovuz” kanali e’lon qilgan bank xabarida.
Qayd etilishicha, ushbu ma’lumot texnik xatolik sabab Korporativ axborot yagona portaliga kiritilgan bo‘lib, yo‘l qo‘yilgan xatolik bartaraf etilmoqda.
Ayni paytda portaldagi ushbu ma’lumotlar o‘chirilgan. Qimmatli qog‘ozlar bozorida axborot taqdim etish va e’lon qilish qoidalariga muvofiq, Korporativ axborot yagona portaliga joylashtirilgan muhim faktlar, choraklik va yillik hisobotlar portalda saqlanib qolinishi, o‘chirilmasligi va tahrirlanmasligi belgilangan.
Eslatib o‘tamiz, “Poytaxt bank” 2019-yilning yanvarida ish boshlagan. Bank ustav kapitali 100 foiz Toshkent shahar hokimligi mablag‘lari hisobiga shakllantirilgan.
Izoh (0)