Ўзбекистон мактабгача таълим вазири ўринбосари Мақсуд Йўлдошев 18 ноябрь куни Қонунчилик палатаси мажлисида рўй берган ҳолатга изоҳ берди.
Вазир ўринбосари «Kun.uz» нашрига берган интервьюсида депутатларга берган ҳисоботида ёлғон йўқлиги, барча сўзларини асослаб бера олишини айтди, аммо ўша вақтда телефонда таниши билан нима мавзуда гаплашганини ва «Обқочишга мажбурмиз энди, нима қиламиз?», деганда нимани назарда тутганини айта олмади.
Мақсуд Йўлдошевнинг маълум қилишича, у 18 ноябрь куни бир вақтнинг ўзида иккита видеоконференцияда қатнашган. «Шогирдимиз илмий ишини ҳимоя қилаётганди. Бизда илмий кенгаш бор докторлик ишлари бўйича. Битта компьютерда илмий кенгашнинг йиғилишига уланган бўлсам, иккинчисида парламент мажлисини кузатиб бордим», — дея таъкидлаган вазир ўринбосари.
«Қонунчилик палатаси мажлисида депутатнинг саволига жавоб бергандан сўнг камерани ўчирибман-да, микрофонни ўчириш ёдимдан чиқибди.
Шу пайт танишимдан қўнғироқ бўлиб қолди. Микрофон ёниқ бўлгани учун тўғридан-тўғри эфирда ушбу мулоқотимизнинг бир қисми эшитилган. Телефондаги сўзлашув шахсий мулоқот бўлиб, бунинг депутатлар саволига берган жавобларимга ҳеч қандай алоқаси йўқ», — дея ҳолатга изоҳ берган Мақсуд Йўлдошев.
«Депутатларга берган ҳар бир жавобим асосли, бу тизимда бўлаётган нарса. Масалан, октябрь—ноябрь ойларида 1700 та битим имзоланди, деганларим, давлат хусусий шерикчиликка йўналтирилган маблағлар, булар ҳаммаси амалиётда бўлиб келаётган нарсалар. Телефондаги суҳбат пайтида айтилган гапимизга буларнинг умуман алоқаси йўқ. Агар кимдадир бунга шубҳа бўладиган бўлса, депутатларга берган жавобимда айтган маълумотларимнинг барчасини асослаб, исботлаб бера оламан», — деб қўшимча қилган вазирлик масъули.
Мақсуд Йўлдошевнинг сўзларига кўра, унга телефон қилган Хуршид исмли киши унинг дўсти, ўзи тенги ўртоғи. «Ўртамизда телефон орқали кечган мулоқот ўта шахсий масала бўлгани учун нима масалани гаплашганимизни очиқлай олмайман», — дея изоҳ берган вазир ўринбосари.
Эслатиб ўтамиз, Олий Мажлис Қонунчилик палатасининг 18 ноябрь куни ўтказилган навбатдаги мажлисида давлат-хусусий шерикчилиги тўғрисидаги саволларга жавоб қайтарган мактабгача таълим вазири ўринбосари Мақсуд Йўлдошев ўчиришни унутиб, «Обқочишга мажбурмиз энди, нима қиламиз?», деган сўзлари тўғридан-тўғри эфирга кетганди. Мажлис Youtube орқали жонли эфирга узатилаётган бўлган. Мақсуд Йўлдошев ўша пайтда қўнғироқ қилган Хуршид исмли шахсга жавоб берган ва унинг «Обқочишга мажбурмиз энди, нима қиламиз?», деган сўзлари депутатларнинг саволларига берган жавобларига нисбатан айтилгани тахмин қилинганди.
Шундан кейин ҳолат юзасидан Мактабгача таълим вазирлиги матбуот котиби Мавлуда Асқархўжаева изоҳ берди. Унинг маълум қилишича, ҳақиқатан ҳам Мақсуд Йўлдошев депутатлар саволларига жавоб бергандан сўнг онлайн узатилаётган эфир микрофонини ўчиришни эсидан чиқариб, иш фаолиятини давом эттирган ҳамда бу жараёнда унга бўлган қўнғироққа жавоб берган.
«Вазир ўринбосари Мақсуд Йўлдошев бу телефон орқали сўзлашув мазмуни депутатларга берилган жавобга алоқаси йўқлигини маълум қилди. Шу муносабат билан, оммавий ахборот воситалари вакилларидан турли хил ‘эҳтимолларъга асосланган фикрларини илгари сурмасликлари ва вазиятга тўғри баҳо беришларини сўраймиз», — дейилади вазирлик матбуот котиби ахборотида.
Олий Мажлис Қонунчилик палатаси депутати Расул Кушербаев вазир ўринбосарининг бу хатти-ҳаракатига шундай муносабат билдирган: «Мактабгача таълим вазири ўринбосари ўзи билмаган ҳолда иш тизими бўйича бор ҳақиқатни очиб қўйди: тизим олиб қочишга мослашган. Бугун депутатларни алдаб олиб қочинг, эртага Президентни алдаб олиб қочинг, кейин халқни алдаб олиб қочинг».
Изоҳ (0)