Qoraqalpog‘istonning Nukus shahrida yashovchi ota sobiq turmushidan bo‘lgan 3 farzandi uchun aliment o‘rniga uy hadya qildi, deya xabar bermoqda Majburiy ijro byurosi “Daryo”ga.
Nukus tumanlararo fuqarolik ishlari bo‘yicha sudi 2018-yil 28-iyulda qarzdor M.U.dan da’vogar G.Jumashevaning foydasiga 3 farzandining moddiy ta’minoti uchun qarzdorning har oydagi daromadining yarmi miqdorida aliment nafaqasi undirishni belgilagan bo‘lib, mazkur ijro hujjati Majburiy ijro byurosi Nukus shahar bo‘limi ish yurituviga 2018-yil 16-iyulda kelib tushgan va ijro ishi yurituvi qo‘zg‘atilgan.
Majburiy ijro harakatlari davomida bo‘lim davlat ijrochilari tomonidan bir necha bor ogohlantirilganiga qaramasdan, qarzdor ota aliment nafaqasini qasddan to‘lamay kelgan va oqibatda 2018-yil 28-iyundan 2019-yil 11-yanvar oralig‘idagi davr uchun qarzdorlik 18 million 149,9 ming so‘mni tashkil qilgan.
Shu bois bo‘lim tomonidan mazkur ijro hujjati yuzasidan tegishli hujjatlar to‘plangan holda Nukus shahar ma’muriy sudiga yuborilgan va 2019-yil 4-dekabrda bo‘lib o‘tgan majlisda sud tomonidan qarzdor otaga 15 kunlik ma’muriy qamoq jazosi tayinlangan.
Bundan keyin ham tegishli xulosa chiqarmagan ota aliment nafaqasini to‘lashdan bo‘yin tovlab kelgani oqibatida 2020-yilning oktabr oyi holatiga qarzdorlik 33 million 151,4 ming so‘mdan oshib ketgan.
Shundan keyin bo‘lim davlat ijrochilari tomonidan qarzdorga kelib chiqishi mumkin bo‘lgan huquqiy oqibatlar tushuntirilganda qarzdor ota o‘z nomidagi uyini berish istagini bildirdi.
Natijada sobiq turmush o‘rtoqlar o‘zaro kelishib, alimentchi ota Nukus shahri hududida joylashgan uy hovlisini sobiq turmush o‘rtog‘i nomiga rasmiylashtirib berdi va mazkur ijro hujjati tegishli tartibda tamomlandi.
Avvalroq Bekobodlik ota 3 nafar farzandi uchun qariyb 134 million so‘m aliment pulini oldindan to‘lagani, Toshkent shahrida ota qariyb 430 million so‘mlik aliment pulini birato‘la to‘lab bergani hamda Andijonlik ota farzandlariga aliment pullari o‘rniga uy sovg‘a qilgani haqida xabar berilgandi.
Izoh (0)