AQSh Sog‘liqni saqlash va ijtimoiy xizmatlar vazirligi AQSh umumiy xizmatlar boshqarmasi demokratlardan nomzod Jo Baydenning prezident saylovlaridagi g‘alabasi haqida rasman ma’lum qilmagunicha, uning jamoasi bilan ishlamaydi. Bu haqda vazirlik rahbari Aleks Azar ma’lum qildi, deb yozadi “RBK”.
“AQSh umumiy xizmatlar boshqarmasi qaror qabul qilganidan keyin vakolatlarning to‘liq, birgalikda va professional tarzda topshirilishini ta’minlashimizni aniq-ravshan aytdik. Biz yo‘riqnomaga amal qilamiz”, — dedi Azar.
Avvalroq demokrat kongressmenlar Adam Shiff va Erik Suoluell AQSh umumiy xizmatlar boshqarmasi rahbari Emili Myorfini Baydenning g‘alabasini tan olishni kechiktirish orqali odamlarning hayotini xavf ostiga qo‘yishda ayblagan edi.
“Agar idora Baydenning g‘alabasini tan olsa, hokimiyatni topshirish jarayoni boshlanadi. Bu Baydenning koronavirus pandemiyasiga qarshi kurashga tayyorlanishi uchun zarurdir”, — dedi Suoluell.
Amaldagi AQSh prezidenti Donald Tramp vakolatlarni topshirishdan bosh tortsa, yanada ko‘proq o‘limlar kelib chiqishi haqida Baydenning o‘zi ham aytgan edi. Uning so‘zlariga ko‘ra, agar hokimiyat topshirilishini 20-yanvargacha kutadigan bo‘lsa, AQSh yana bir yarim oy yo‘qotadi. “Koordinatsiya hozir yoki iloji boricha tezroq bo‘lishi muhimdir”, — dedi Bayden.
AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat Konstitutsiyasi buzilganini aytgan.
Izoh (0)